မင်းတုန်းတွင် တပ်ပြေး ၅ ဦးကိုတော်လှန်ရေးတပ်ဖွဲ့က ဖမ်းဆီးရမိ

PSM(News)

သြဂုတ် ၃၁၊ ၂၀၂၆

မကွေးတိုင်း၊ မင်းတုန်းမြို့နယ်အတွင်း ဖြစ်ပွားနေသော တိုက်ပွဲများမှနေ၍ စစ်အုပ်စုစစ်ကြောင်းမှ ထွက်ပြေးလာသည့် တပ်ပြေး ငါး ဦးကို သုံ့ပန်းအဖြစ် ဖမ်းဆီးရမိထားကြောင်း သရက်ခရိုင် တပ်ရင်း (၄) မှ ကိုမြတ် က PSM ကို ‌ပြောသည်။

ပြီးခဲ့သည့် ဩဂုတ်လ ၂၂ရက်နေ့က မင်းတုန်းမြို့အတွင်းသို့ စစ်အင်အား ၂၀၀၀ ခန့် ကို ပို့ဆောင်ပြီးနောက် မင်းတုန်းမြို့နယ်အနောက်ခြမ်းရှိ ရခိုင်ရိုးမတောင်ခြေနှင့် ထိစပ်နေ‌သော ဒေသများသို့ထပ်မံ စစ်ကြောင်းထိုးလာခြင်းဖြစ်သည်။

” မင်းတုံးကို ဒါက ဒုတိယအကြိမ်။ ပထမ အကြိမ်ကတော့ ‌၄လပိုင်းကုန် ၅လပိုင်း လောက် ကတည်းက အင်အား ၁၀၀၀ လောက်ပို့ပြီးတော့ စစ်ကြောင်းထိုးနေတာရှိတယ်။ အဲဒီမှာ သူတို့ ရှေ့မတိုးနိုင်တဲ့ အတွက် အခု ၁၅၀၀၊ ၂၀၀၀ခန့် ထပ်ဖြည့်ပြီးထိုးတာ ” ဟု ကိုမြတ်ကဆိုသည်။

လက်ရှိ စစ်ကြောင်းသည့် မင်းတုန်းမြို့ကနေ မြို့နယ် အနောက်ပိုင်း ရခိုင်ရိုးမ တောင်ခြေနှင့် ထိစပ်နေသော ဒေသများသို့ ဖြန့်ခွဲကာ စစ်ကြောင်းထိုးနေသည်မှာ ရက်သတ္တပတ် တစ်ပတ်ခန့်သာရှိ‌သေးကြောင်း ၎င်းကဆက်ပြောသည်။

” သုံ့ပန်းက ငါး ဦးပါ။ အခု ကျွန်တာ်တို့ သုံ့ပန်းတွေ ဖမ်းမိတယ်ဆိုတာက မနေ့က ဖြစ်ခဲ့တဲ့ တိုက်ပွဲအတွင်းမှာ ဖမ်းမိတာ မဟုတ်ပါဘူး။ အနောက်ခြမ်းထဲကကျန်တဲ့ စစ်ကြောင်းတစ်ခုကနေ ထွက်ပြေးလာတာကို ဖမ်းမိတာပါ ” ဟု ကိုမြတ်က ဖမ်းဆီးရမိသည့် အခြေအနေကို ရှင်းပြသည်။

စစ်အုပ်စုသည် မင်းတုန်းမြို့နယ်အနောက်ပိုင်း ပြန် လည် စိုးမိုးနိုင်ရေး၊ မကွေးတိုင်းနှင့် ရခိုင်ပြည် နယ် သို့ ဆက်သွယ်ထားသည့် မင်း‎တုန်း – မအီ ကုန်သွယ်ရေးလမ်းကြောင်းတို့ကို ‎ဖြတ်တောင် နိုင်ရေးတို့အတွက် အင်အား အလုံးအရင်းဖြင့် ထိုးစစ်ဆင်နေခြင်းဖြစ် သည်။

ဧပြီလနှောင်းပိုင်း၌ အင်အား ၁၀၀၀ ခန့်ဖြင့် ပထမ အကြိမ် ထိုးစစ်ဆင်ခဲ့‌‌သော်လည်း AA၊ PDF ပူးပေါင်းတပ်ဖွဲ့များ၏ ဖြတ်တောက်တိုက်ခိုက်မှုကြောင့် အထိနာက တပ်လန်ကျခဲ့ပြီး ယခုအခါအင်အား ၂၀၀၀ ခန့်ကို အသုံးပြုကာ ဒုတိယ အကြိမ် ထိုးစစ်ဆင်နေခြင်းဖြစ် သည်။