မိုးလေဝသ

အန္ဒိယမိုးလေဝသဌာန IMD ရဲ့ ထုတ်ပြန်ချက်အရ လက်ရှိရာသီဥတုအခြေအနေဟာ ကြားနေရာသီဥတုဖြစ်တဲ့ ENSO-neutral ကနေ အယ်နီညိုအခြေကို စတင်ကူးပြောင်းနေပြီလို့ သိရပါတယ်။ ဒါ့အပြင် အန္ဒိယနီညိုဖြစ်တဲ့ IOD ကလည်း မုတ်သုံရာသီအကုန်ပိုင်းမှာ Positive IOD အခြေအနေကို ရောက်ရှိနိုင်မှာ ဖြစ်တယ်လို့ ဖော်ပြထားပြီး မြန်မာနိုင်ငံရဲ့ ရာသီဥတုဖြစ်စဉ်တွေကို ဖော်ပြပေးနေတဲ့ MM Weather Web ကလည်း ကြားနေရာသီဥတုကနေ လက်ရှိမေလကနေ ဇူလိုင်လအတွင်း အယ်နီညို ဖြစ်နိုင်ခြေဟာ ဒီနှစ်ကုန်ပိုင်းအထိ ၆၁ % ရှိနေမှာဖြစ်တယ်လို့ ထုတ်ပြန်ထားပါတယ်။ လက်ရှိ မိုးတိမ်စုလှိုင်း MJO ကလည်း အဆင့် ၄ နေရာမှာရှိနေတာကြောင့် ဘင်္ဂလားပင်လယ်အော်အလယ်ပိုင်းနဲ့ မြောက်ပိုင်းတို့မှာ ဒီတစ်ပတ်အတွင်း မိုးတိမ်ဖြစ်ထွန်းမှုတွေ အားကောင်းနေမှာ ဖြစ်ပြီးမုန်တိုင်းငယ်တစ်လုံး ဖြစ်လာဖို့တော့ မရှိဘူးလို့ အန္ဒိယမိုးလေဝသဌာန IMD ကခန့်မှန်းထားပါတယ်။ လက်ရှိမှာတော့ ဘင်္ဂလားပင်လယ်အော်မှာ ဖြစ်ပေါ်နေတဲ့ လေဖိအားနည်းရပ်ဝန်းဟာ ဆက်လက်အားကောင်းနေပြီး အနောက်တောင်မုတ်သုံလေဟာလည်း ကပ္ပလီပင်လယ်ပြင်အတွင်း အားကောင်းကောင်းနဲ့ ရောက်ရှိနေပြီဖြစ်ပါတယ်။ လာမယ့် ၂ ရက်အတွင်းမှာတော့ အနောက်တောင်မုတ်သုံလေဟာ မြန်မာနိုင်ငံတောင်ပိုင်းဒေသတွေဖြစ်တဲ့ တနင်္သာရီတိုင်းနဲ့ မွန်ပြည်နယ်တို့ဆီကို ဆက်လက်ဝင်ရောက်လာနိုင်မှာ ဖြစ်တယ်လို့ မိုးလေဝသပညာရှင် ဦးဝင်းနိုင်က ခန့်မှန်းထားပါတယ်။ ဒီနေ့မှာတော့ မွန် တနင်္သာရီကမ်းရိုးတန်းတလျောက်နဲ့ မြစ်ဝကျွန်းပေါ်ကမ်းရိုးတန်း တလျောက်မှာ မိုးသည်းထန်စွာ ရွာသွန်းနိုင်ပြီး တနင်္သာရီတိုင်း မွန်ပြည် ကရင်ပြည် ပဲခူးတိုင်း ရန်ကုန်တိုင်းနဲ့ ဧရာဝတီတိုင်းတို့မှာ မိိုးအနည်းငယ်ကနေ မိုးအသင့်အတင့် ရွာသွန်းနိုင်မှာ ဖြစ်ပါတယ်။ ဒါ့အပြင် ကရင်နီပြည် ကချင်ပြည်နဲ့ စစ်ကိုင်းတိုင်းတို့မှာတော့ နေရာကျဲကျဲ မိုးအနည်းငယ်ရွာသွန်းနိုင်ပြီး ကျန်ပြည်နယ်နဲ့ တိုင်းတွေမှာတော့ နေရာကွက်ကျား မိုးအနည်းငယ်ရွာသွန်းနိုင်မှာ ဖြစ်ပါတယ်။ နောက်နှစ်ရက်အတွင်းမှာတော့ မွန် တနင်္သာရီကမ်းရိုးတန်းတလျောက်မှာ မိုးအလွန်များနိုင်ကာ မိုးရေချိန် ၄ လက်မလောက်အထိ ရရှိနိုင်ပြီး လေပြင်းတိုက်ခတ်မှုတွေ ရှိနေတာကြောင့် သတိပြုနေထိုင်ကြဖို့ အကြံပြုလိုပါတယ်။ ဆက်လက်ပြီး PSM News ရဲ့ မိုးလေဝသသတင်းတွေကို နေ့စဉ်စောင့်ကြည့်နေသူတွေကမေးမြန်းထားတဲ့ ဒေသအလိုက် အခြေအနေတွေ မှာတော့ မကွေးတိုင်းက တောင်တွင်းကြီးနဲ့ ပွင့်ဖြူမြို့နယ်အတွင်းမှာ ဒီရက်ပိုင်းတွေအတွင်း မိုးရွာသွန်းနိုင်ခြေ အလွန်နည်းပါးနေပါတယ်။ မန္တလေးတိုင်း ကျောက်ဆည်မြို့နယ်မှာတော့ နောက်နှစ်ရက်အတွင်း မိုးရွာနိုင်ခြေနည်းနေပေမဲ့ မိုးအုံ့တာ မိုးဖွဲအနည်းငယ်ကျတာတွေတော့ ဖြစ်နိုင်ပါတယ်။ ရခိုင်ကမ်းရိုးတန်းတလျောက်မှာတော့ မေလ ၁၈ ရက်နေ့အထိ မိုးအနည်းငယ်ရွာသွန်းနိုင်ပြီး လေတိုက်နှုန်း ၅ မိုင်ကနေ ၁၀ မိုင်ဝန်းကျင်ရှိနိုင်ပြီး ရုတ်တရက် လေပြင်းတိုက်ခတ်နှုန်းကတော့ တစ်နာရီ မိုင် ၂၀ ကနေ ၂၆ မိုင် ဝန်းကျင် ရှိနိုင်ပါတယ်။ ပင်လယ်ပြင်အခြေအနေမှာတော့ ဘင်္ဂလားပင်လယ်အော် မြောက်ပိုင်းမှာ တိမ်အနည်းငယ်ဖြစ်ထွန်းနေပြီး ကပ္ပလီပင်လယ်ပြင်နဲ့ ကျန်ဘင်္ဂလားပင်လယ်အော်တို့မှာ တိမ်အသင့်အတင့်ကနေ တိမ်ထူထပ်နေကာ မိုးသည်းထန်နိုင်ပါတယ်။ အထူးသဖြင့် ဘင်္ဂလားပင်လယ်အော်တောင်ပိုင်းနဲ့ ကပ္ပလီပင်လယ်ပြင်တို့မှာ ဒီနေ့ကနေ လာမယ့် မေလ ၁၈ ရက်နေ့အထိ အနောက်တောင်မုတ်သုံလေ အားကောင်းကောင်းနဲ့ ဝင်ရောက်လာတာကြောင့် တစ်နာရီ မိုင် ၃၀ ကနေ မိုင် ၄၀ အထိ တိုက်ခတ်နိုင်တာကြောင့် လှိုင်းကြီး လေထန်နိုင်မှာကို ပင်လယ်ပြင်အတွင်းသွားလာနေသူတွေအနေနဲ့ သတိပြုဖို့ လိုပြီး အတတ်နိုင်ဆုံး ပင်လယ်ပြင်ခရီးသွားလာခြင်းမပြုလုပ်ကြဖို့ အကြံပြုလိုပါတယ်။ ဒါ့အပြင် တနင်္သာရီကမ်းရိုးတန်းတလျောက်နဲ့ တနင်္သာရီတိုင်းနဲ့ ထိုင်းနယ်စပ်တလျောက်မှာလည်း လေတိုက်နှုန်း တစ်နာရီ မိုင် ၄၀ ဝန်းကျင်အထိ တိိုက်ခတ်နိုင်တာကြောင့် ကြိုတင်ပြင်ဆင်မှုတွေ ပြုလုပ်ထားကြဖို့ တိုက်တွန်းလိုက်ရပါတယ်ရှင်။ PSM ရဲ့ ပရိတ်သတ်များရှင် မိုးလေဝဖြစ်စဉ်တွေဟာ များသောအားဖြင့် ၇၀ ရာခိုင်နှုန်းခန့်သာ မှန်နိုင်ပြီး အချိန်နဲ့အမျှ ပြောင်းလဲနိုင်ပါတယ်။