PSM (News) ဩဂုတ် ၂၂ ၊၂၀၂၆ အမေရိကန်နှင့် တောင်ကိုရီးယား စစ်တပ်တို့သည် “Ulchi Freedom Shield” နှစ်စဉ် စစ်ရေးလေ့ကျင့်မှုကို မူလသတ်မှတ်ထားသည့်ရက်ထက် ခြောက်ရက်စောကာ သောကြာနေ့တွင် အပြီးသတ် ရပ်စဲလိုက်ကြောင်း ကြေညာခဲ့သည်။ ယင်းသို့ ဆောင်ရွက်ခြင်းမှာ မြောက်ကိုရီးယားဘက်သို့ ချစ်ကြည်ရေးပြသသည့် အနေဖြင့် လုပ်ဆောင်ခြင်းဖြစ်သော်လည်း မြောက်ကိုရီးယားကမူ ဤအချက်သည် ဆွေးနွေးပွဲများသို့ ပြန်လည်လာရောက်ရန် မလုံလောက်သေးကြောင်း တုံ့ပြန်ပြောကြားခဲ့သည်။ သမ္မတ ဒေါ်နယ်ထရမ့်သည် မြောက်ကိုရီးယားခေါင်းဆောင် ကင်ဂျုံအွန်နှင့် ကောင်းမွန်သော ဆက်ဆံရေးရှိကြောင်းနှင့် အီရန်စစ်ပွဲတွင် တောင်ကိုရီးယားက ထောက်ပံ့ရန် ငြင်းဆိုခဲ့မှုများကို ကိုးကားကာ အဆိုပါစစ်ရေးလေ့ကျင့်မှုကို “သိသိသာသာ လျှော့ချရန်” ရုတ်တရက် အမိန့်ပေးခဲ့ခြင်း ဖြစ်သည်။ သို့သော် မြောက်ကိုရီးယားခေါင်းဆောင်၏ ညီမဖြစ်သူ ကင်ယိုဂျုံက စစ်ရေးလေ့ကျင့်မှု ကာလနှင့် ပမာဏကို လျှော့ချရုံမျှဖြင့် ၎င်းတို့၏ ရန်လိုသော သဘောသဘာဝ ပြောင်းလဲသွားမည် မဟုတ်ကြောင်း ဗုဒ္ဓဟူးနေ့တွင် ပယ်ချခဲ့သည်။ ယင်းနောက် တစ်ရက်အကြာတွင် မြောက်ကိုရီးယားသည် ပင်လယ်ပြင်ဘက်သို့ ရေတိုပစ် ပဲ့ထိန်းဒုံးကျည် (၁၀) စင်းခန့်ကို ပစ်လွှတ်ကာ တုံ့ပြန်ခဲ့သည်။ ယခုကဲ့သို့ အခြေအနေများကြောင့် ၂၀၁၉ ခုနှစ်က ပျက်ပြားသွားခဲ့သော အမေရိကန်နှင့် မြောက်ကိုရီးယား နှစ်နိုင်ငံအကြား သံတမန်ရေးရာ ဆွေးနွေးပွဲများ အမြန်ဆုံး ပြန်လည်စတင်ရန် မျှော်လင့်ချက်များ မှေးမှိန်သွားခဲ့ရသည်။ သို့သော် မြောက်ကိုရီးယားဘက်က တင်းမာလွန်းသည့် စကားသုံးနှုန်းမှုများကို ရှောင်ရှားခဲ့ခြင်းကြောင့် အနာဂတ်တွင် ပိုမိုကြီးမားသော အပေးအယူများ ရရှိရန်အတွက် တံခါးပိတ်မထားဘဲ ဆက်လက်စောင့်ကြည့်နေပုံ ရကြောင်း လေ့လာသူများက သုံးသပ်ကြသည်။ ကိုးကား-AP Post navigation ဟွန်ဒိုင်းမော်တော်ကားကုမ္ပဏီသမဂ္ဂဆယ်စုနှစ်တစ်ခုအတွင်းပထမဆုံးအကြိမ်အလုပ်သမားများအလုံးစုံသပိတ်မှောက် ဟော်မုဇ် ရေလက်ကြားကို ဖြတ်သန်းခွင့် အီရတ် ရေနံတင်သင်္ဘောအချို့အား အီရန် ခွင့်ပြုချက်ပေး
