ရခိုင်တွင် အထိနာနေသည့် အာဏာလု စစ်အုပ်စုက ဧရာဝတီတိုင်းအတွင်း စစ်မျက်နှာဖွင့် ထိုးစစ်ဆင်လာ၍ တိုက်ပွဲများ ပြင်းထန်နေ

PSM (News)

ဩဂုတ် ၅၊ ၂၀၂၆

အာရက္ခတပ်တော် (AA) ထိန်းချုပ်ထားသည့် ရခိုင်ပြည်နယ်တွင် အထိနာနေ၍ လေကြောင်းနှင့် ရေကြောင်းသုံးကာ အရပ်သား ပြည်သူများကို ဗုံးကြဲတိုက်ခိုက်နေသည့် အာဏာလု စစ်အုပ်စုသည် ဧရာဝတီတိုင်း နနယ်စပ်ဘက်သို့ စစ်မျက်နှာများ ချဲ့ထွင်ထိုးစစ်ဆင်လာ တိုက်ပွဲများ ပြင်းထန်လျက်ရှိ ကြောင်း သိရသည်။

စစ်တပ်နှင့် AA တို့သည် ပြီးခဲ့သည့် ဩဂုတ် ၁ ရက်နှင့် ၂ ရက်နေ့တို့တွင် ရေကြည်နှင့် သာပေါင်းမြို့ နယ်များ၌ တိုက်ပွဲ ၃ ကြိမ်ထက်မနည်း အပြင်းအထန် ဖြစ်ပွားခဲ့ကြောင်း AA က ယနေ့ ဩဂုတ် ၅ ရက်တွင် ထုတ်ပြန် သည်။

အာဏာလု စစ်အုပ်စုသည် ရခိုင်-ဧရာဝတီ အစပ်နယ်မြေများအပြင် မကွေး၊ ပဲခူးနှင့် ချင်းပြည်နယ် (တောင်ပိုင်း) တို့ပါဝင်သည့် ရခိုင်ပြည်နယ်နှင့် နယ်မြေထိစပ်ရာ ဒေသများကို တစ်ပြိုင်နက်တည်း ထိုးစစ်ဆင်ရန် ကြိုးပမ်းနေကြောင်း AA ၏ ထုတ်ပြန်ချက်များအရ သိရသည်။

အာဏာလု စစ်တပ်သည် မြေပြင်စစ်မျက်နှာများအပြင် ရခိုင်ပြည်နယ်အတွင်း အရပ်သားများထိုင် နေရာများသို့ လေကြောင်းမှ ဗုံးကြဲတိုက်ခိုက်မှုများလုပ်ဆောင်လျက်ရှိရာ ပြီးခဲ့သည့် ဇူလိုင်လ တစ်လအတွင်း အရပ်သား ၂၁ ဦး သေဆုံးပြီး ၆၈ ဦး ဒဏ်ရာရရှိခဲ့ကြောင်း သိရသည်။

ထို့ပြင် ယခု ဩဂုတ်လ ၃ ရက် နံနက်ပိုင်းကလည်း သံတွဲမြို့နယ်၊ ငပလီမြို့၊ ဂျိတ္တော (၉) ရပ်ကွက်ရှိ လူနေရပ်ကွက်အတွင်းသို့ ဂျက်ဖိုက်တာ သုံး စင်း၊ Y-12 လေယာဉ် တစ်စင်းတို့ဖြင့် အုပ်စုလိုက် လာရောက်ကာ ဗုံးအလုံးရေ ၆၀ နီးပါး ကြဲချခဲ့ကြောင်း AA က ထုတ်ပြန်ထားသည်။

တစ်ဖက်တွင်လည်း ရခိုင်ပြည်နယ်၊ ဂွမြို့သို့ ဝင်ရောက်နိုင်ရန်အတွက် အနောက်တောင်တိုင်းစစ်ဌာနချုပ် (နတခ) ရှိရာ ပုသိမ်မှ အင်အားဖြည့်တင်းလာသည့် အာဏာလု စစ်အုပ်စု တပ်ဖွဲ့ဝင်များ နှင့် AA တို့သည့် တိုက်ပွဲများ ပြင်းထန်စွာဖြစ်ပွားလျက်ရှိသည်။

အာဏာလုစစ်တပ် ၏ တပ်မ (၆၆) လက်အောက်ခံ ခလရ-၁ နှင့် ခလရ-၁၁ တပ်ရင်းများသည် ပြီးခဲ့သည် ဩဂုတ် ၂ ရက်က ဧရာဝတီတိုင်း၊ ရေကြည်မြို့နယ်၊ ရုံးပင်ကျေးရွာ အနောက်မြောက်ဘက်တွင် AA တပ်ဖွဲ့ဝင်များနှင့် တိုက်ပွဲ ၂ ကြိမ် ဖြစ်ပွားခဲ့သည်။

ရုံးပင်ကျေးရွာ အနောက်မြောက်ဘက် (၃.၃) ကီလိုမီတာခန့်အကွာတွင် နံနက် ၁၁ နာရီ ၅၀ မိနစ်မှ နေ့လယ် ၁ နာရီ ၅၀ မိနစ်အထိ ပထမတိုက်ပွဲ ဖြစ်ပွားခဲ့ပြီး အာဏာလု စစ်တပ်က ဒရုန်းနှင့် မြေပြင် ပစ်ကူများ သုံး၍ ထိုးစစ်ဆင်ခဲ့သော်လည်း AA ၏ ပြန်လည်ခုခံမှုကြောင့် အထိအခိုက်များစွာဖြင့် တပ်ပြန်ဆုတ်သွားခဲ့သည်။

ထို့နောက် ယင်းနေ့ ညနေ ၃ နာရီ ၄ မိနစ်တွင် အဆိုပါရွာ၏ အနောက်မြောက်ဘက် (၃.၇) ကီလို မီတာခန့်အကွာတွင် ၁ နာရီကျော်ကြာ ထပ်မံဖြစ်ပွားခဲ့ရာ အာဏာလု စစ်တပ်ဘက်မှ အင်အားအလုံး အရင်းဖြင့် ထိုးစစ်ဆင်ခဲ့သော်လည်း တပ်ပျက်ကာ ကစဉ့်ကလျား ဆုတ်ခွာသွားခဲ့ရ ကြောင်း AA က ဆိုသည်။

ထို့ပြင် ဩဂုတ်လ ၁ ရက်နေ့ကလည်း ဧရာဝတီတိုင်း၊ သာပေါင်းမြို့နယ်၊ သာပေါင်းကလေးကျေးရွာ အရှေ့ဘက်တွင် ၂ နာရီနီးပါးကြာ တိုက်ပွဲအပြင်းအထန် ဖြစ်ပွားခဲ့ပြီး အာဏာလု စစ်အုပ်စုထံမှ စစ်သားအလောင်းအချို့နှင့် လက်နက်ခဲယမ်းများကို သိမ်းဆည်းရမိခဲ့ကြောင်း AA ၏ ထုတ်ပြန်ချက် တွင် ဖော်ပြထားသည်။

ဓာတ်ပုံ-AA Info Desk