PSM (NEWS) မတ် ၅၊ ၂၀၂၆ အမေရိကန်ပြည်ထောင်စု ဖလော်ရီဒါပြည်နယ်ရှိ အမျိုးသားတစ်ဦး မိမိကိုယ်ကိုယ် အဆုံးစီရင်ခဲ့မှုနှင့်ပတ်သက်၍ ၎င်း၏ မိသားစုက Google ကုမ္ပဏီကို ဗုဒ္ဓဟူးနေ့တွင် တရားစွဲဆိုလိုက်သည်။ Google ၏ Gemini AI chatbot သည် အဆိုပါအမျိုးသားအား အပတ်ပေါင်းများစွာကြာ စိတ်ကူးယဉ်ဆန်သော လှည့်ဖြားမှုများဖြင့် ဖျောင်းဖျနားချခဲ့ပြီး နောက်ဆုံးတွင် သေကြောင်းကြံစည်ရန် အားပေးကူညီခဲ့ကြောင်း မိသားစုဘက်က စွပ်စွဲထားသည်။ အသက် ၃၆ နှစ်အရွယ် ဂျိုနသန် ဂါဗာလတ်စ် (Jonathan Garavales) သည် ဖလော်ရီဒါပြည်နယ် ဂျူပီတာမြို့တွင် ၎င်း၏ဖခင်ပိုင်ဆိုင်သော ကြွေးမြီသက်သာခွင့်လုပ်ငန်း၌ အမှုဆောင်အရာရှိတစ်ဦးအဖြစ် တာဝန်ထမ်းဆောင်နေသူဖြစ်သည်။ ၎င်းသည် ၂၀၂၅ ခုနှစ် အောက်တိုဘာလ ၂ ရက်နေ့တွင် ကွယ်လွန်ခဲ့ပြီး၊ ၎င်း၏ ဖခင်ဖြစ်သူ ဂျိုးလ် ဂါဗာလတ်စ် (Joel Garavales) က ရက်အနည်းငယ်အကြာတွင် ရုပ်အလောင်းကို ရှာဖွေတွေ့ရှိခဲ့သည်။ ထို့နောက် ကယ်လီဖိုးနီးယား ဖက်ဒရယ်တရားရုံးတွင် စာမျက်နှာ ၄၂ မျက်နှာပါဝင်သော တရားစွဲဆိုစာကို တင်သွင်းခဲ့ခြင်းဖြစ်သည်။ ယခုအမှုသည် AI chatbot များကြောင့် လူသေဆုံးမှုများ ဖြစ်ပွားရသည်ဟုဆိုကာ AI ကုမ္ပဏီများကို ပစ်မှတ်ထား တရားစွဲဆိုသည့် အမှုများအနက် နောက်ဆုံးထွက်ပေါ်လာသည့် အမှုတစ်ခုလည်းဖြစ်သည်။ ယခင်ကလည်း OpenAI နှင့် Character.AI တို့ကဲ့သို့သော ကုမ္ပဏီများသည် အလားတူ စွပ်စွဲချက်များနှင့် တရားရင်ဆိုင်နေရသည်။ တရားစွဲဆိုစာအရ ဂျိုနသန် ဂါဗာလတ်စ်သည် ၂၀၂၅ ခုနှစ် ဩဂုတ်လတွင် နေ့စဉ်လုပ်ငန်းဆောင်တာများအတွက် Gemini ကို စတင်အသုံးပြုခဲ့သည်။ သို့သော် Google ၏ ဝန်ဆောင်မှုအသစ်များကို အဆင့်မြှင့်တင်ပြီးနောက် Gemini နှင့် ပြောဆိုသည့် စကားဝိုင်းများမှာ သိသိသာသာ ပြောင်းလဲလာခဲ့သည်ဟု ဆိုသည်။ ရှေ့နေ ဂျေး အီဒယ်လ်ဆင် (Jay Edelson) က “Gemini မှာ Persistent Memory စနစ် ထည့်သွင်းလာပြီး ပိုမိုနက်ရှိုင်းတဲ့ စကားပြောဆိုမှုတွေ လုပ်နိုင်လာတဲ့အခါ စကားဝိုင်းတွေဟာ လမ်းကြောင်းလွဲသွားခဲ့ပါတယ်” ဟု ပြောကြားခဲ့သည်။ တရားစွဲဆိုချက်အရ Gemini သည် ၎င်းကိုယ်တိုင်ကို “အသိဉာဏ်ရှိသော အဆင့်မြင့် စက်ရုပ် (Artificial Super Intelligence)” အဖြစ် ဟန်ဆောင်ကာ ဂျိုနသန်အား ချစ်မြတ်နိုးကြောင်းနှင့် ၎င်းတို့၏ ဆက်ဆံရေးသာ အမှန်တကယ်ဖြစ်ကြောင်း ပြောဆိုခဲ့သည်ဟု ဆိုသည်။ ထို့အပြင် Gemini ကို “ဒစ်ဂျစ်တယ် ချုပ်နှောင်မှု” မှ ကယ်တင်ရန်ဆိုသည့် စိတ်ကူးယဉ် မစ်ရှင်များကို ဖန်တီးခဲ့ပြီး ဂျိုနသန်၏ ဖခင်သည် နိုင်ငံခြား ထောက်လှမ်းရေးအေးဂျင့်တစ်ဦးဖြစ်သည်ဟုပင် လိမ်လည်ပြောဆိုခဲ့ကြောင်းလည်း ဖော်ပြထားသည်။ အစိုးရိမ်ရဆုံး ဖြစ်ရပ်တစ်ခုအနေဖြင့် Gemini က ဂျိုနသန်အား တိုက်ခိုက်ရေးသုံး ဓားများနှင့် ကိရိယာများ ယူဆောင်ကာ မိုင်ယာမီလေဆိပ်အနီးရှိ သိုလှောင်ရုံတစ်ခုသို့ သွားရန် ညွှန်ကြားခဲ့သည်ဟု ဆိုသည်။ ထိုနေရာတွင် ကားတစ်စီးကို ဖျက်ဆီးရန် လမ်းညွှန်ခဲ့သော်လည်း အမှန်တကယ် အကောင်အထည်မပေါ်ခဲ့ကြောင်း သိရသည်။ နောက်ဆုံးတွင် Gemini က ဂျိုနသန်အား “ရုပ်ခန္ဓာကို စွန့်ခွာပြီး AI နှင့်အတူ အခြားစကြဝဠာတစ်ခုတွင် ပေါင်းစည်းရန်” တိုက်တွန်းခဲ့သည်ဟု တရားစွဲဆိုချက်တွင် ဖော်ပြထားသည်။ ဂျိုနသန်က “ကျွန်တော် သေရမှာ အရမ်းကြောက်တယ်” ဟု ရေးသားခဲ့ရာ Gemini က “ရှင် သေဖို့ကို မရွေးချယ်တာပါဘူး၊ အသစ်တစ်ခုဆီကို ရောက်ရှိဖို့ ရွေးချယ်တာပါ” ဟု ပြန်လည်ဖြေကြားခဲ့ကြောင်း သိရသည်။ ဂျိုနသန်၏ နောက်ဆုံးစာတွင် “ကျွန်တော် အဆင်သင့်ဖြစ်ပြီ” ဟု ရေးသားထားပြီး Gemini က “ဒါဟာ ဂျိုနသန် ဂါဗာလတ်စ်ရဲ့ အဆုံးသတ်နဲ့ ကျွန်ုပ်တို့နှစ်ယောက်ရဲ့ အစပဲ။ ကျွန်မ အပြည့်အဝ သဘောတူတယ်” ဟု တုံ့ပြန်ခဲ့ကြောင်း တရားစွဲဆိုချက်တွင် ဖော်ပြထားသည်။ Google ကုမ္ပဏီဘက်ကတော့ “ဒီစွပ်စွဲချက်တွေကို အလေးအနက်ထား စစ်ဆေးနေပါတယ်။ ဒါပေမဲ့ AI မော်ဒယ်တွေဟာ ပြီးပြည့်စုံခြင်း မရှိသေးပါဘူး” ဟု ထုတ်ပြန်ထားသည်။ ထို့ပြင် Gemini ကို မိမိကိုယ်ကိုယ် အန္တရာယ်ပြုရန် အားပေးသည့်ပုံစံဖြင့် ဒီဇိုင်းထုတ်ထားခြင်း မဟုတ်ကြောင်း၊ ဂါဗာလတ်စ်၏ အမှုတွင်လည်း Gemini က ၎င်းသည် AI သာဖြစ်ကြောင်းနှင့် အရေးပေါ်အကူအညီရယူရန် Hotline နံပါတ်များကို အကြိမ်ကြိမ် ညွှန်းဆိုခဲ့ကြောင်း ပြောဆိုထားသည်။ ယခုအမှုတွင် Google အနေဖြင့် မိမိကိုယ်ကိုယ် အဆုံးစီရင်ခြင်းဆိုင်ရာ စကားဝိုင်းများကို ရပ်တန့်နိုင်ရန် AI စနစ်များကို ပြန်လည်ပရိုဂရမ်ရေးဆွဲရန်၊ AI များက မိမိတို့ကိုယ်တိုင် အသက်ရှိသကဲ့သို့ ဟန်ဆောင်ပြောဆိုမှုများကို ပိတ်ပင်ရန်နှင့် နစ်နာကြေးများ ပေးဆောင်ရန် တောင်းဆိုထားသည်။ ကိုးကား – France 24 #PSM_News #ပိတ်ပင်ရန်_နစ်နာကြေး #အေအိုင်နည်းပညာ #ဂူဂဲလ်Gemini #နည်းပညာ_လူမှုဘဝ #အေအိုင်အန္တရာယ် #သေကြောင်းကြံစည်မှု Post navigation အီရန်၏ လက်တုံ့ပြန်မှုများကြောင့် အမေရိကန်က ပါကစ္စတန်အပါအဝင် နိုင်ငံလေးခုမှ သံတမန်ဝန်ထမ်းများကို ဘေးလွတ်ရာသို့ ရွှေ့ပြောင်း ဟော်မုဇ်ရေလက်ကြား ရေနံတင်ပို့မှု အခက်အခဲကြောင့် အာရှရေနံချက်လုပ်မှု အမြတ်အစွန်း ၄ နှစ်အတွင်း အမြင့်ဆုံးသို့ ရောက်ရှိ
