မကွေးတိုင်းတွင် အာဏာလုစစ်အုပ်စုတပ်နှင့် တိုက်ပွဲပေါင်း ၄၃ ကြိမ်ဖြစ်ပွားပြီး ဗိုလ်မှူးနှင့် ဗိုလ်ကြီး အပါအဝင် ၁၈ ဦးကို သုံ့ပန်းအဖြစ် ဖမ်းဆီးရမိ

PSM(News)

ဇွန် ၄၊ ၂၀၂၆

မကွေးတိုင်းစစ်ဌာနအတွင်း ပြီးခဲ့သည့် မေလနှင့် ဇွန်လပထမပတ်အတွင်း အာဏာလုစစ်အုပ်စုတပ်နှင့် ပြည်သူ့ကာကွယ်ရေးတပ်မတော် (PDF) တပ်ရင်းများအကြား တိုက်ပွဲကြီးငယ်ပေါင်း ၄၃ ကြိမ် ထက်မနည်း ပြင်းထန်စွာဖြစ်ပွားခဲ့သည်။

ထိုသို့ ဖြစ်ပွားရာတွင် စစ်အုပ်စုဘက်မှ ဗိုလ်မှူးတစ်ဦးနှင့် ဗိုလ်ကြီးတစ်ဦး အပါအဝင် စုစုပေါင်း သုံ့ပန်း ၁၈ ဦးကို လက်နက်ခဲယမ်းများနှင့်အတူ ဖမ်းဆီးရမိခဲ့ကြောင်း ယနေ့ ဇွန် ၄ ရက်တွင် အမျိုးသား ညီညွတ်ရေးအစိုးရ (NUG)၊ ကာကွယ်ရေးဝန်ကြီးဌာန၊ ပြည်သူ့ကာကွယ်ရေးတပ်မတော် (PDF) စစ်ရုံးချုပ်က ထုတ်ပြန်သည်။

မကွေးတိုင်းအတွင်း ဖော်ဆောင်ခဲ့သည့် စစ်ဆင်ရေးကာလအတွင်း အာဏာလုစစ်အုပ်စုတပ်မှ တပ်သား ၃၁ ဦး သေဆုံးကာ ၅၂ ဦး ပြင်းထန်စွာ ထိခိုက်ဒဏ်ရာရရှိခဲ့သည်။

သရက်ခရိုင်တပ်ရင်း (၃) ၏ နယ်မြေရှင်းလင်းရေး ထိတွေ့တိုက်ပွဲအတွင်း ခမရ-၅၉၉ မှ စစ်အုပ်စု အရာရှိများဖြစ်ကြသည့် ဗိုလ်မှူးအောင်ဖြိုးဝေ နှင့် ဗိုလ်ကြီးပြည့်စုံအောင် တို့ကို သုံ့ပန်းအချို့နှင့်အတူ ဖမ်းဆီးရမိခဲ့မိခဲ့ပြီး ၎င်းတို့ထံမှ ပစ္စတို ၁၉ လက်၊ ကျည်ဘောက် ၃၈ ခုနှင့် ဖုန်း ၃ လုံးတို့ကိုလည်း သိမ်းပိုက်ရရှိခဲ့ကြောင်း သိရသည်။

ထို့ပြင် ဇွန် ၃ ရက်နေ့ကလည်း မင်းတုန်းမြို့နယ်အတွင်းသို့ စစ်ကြောင်းထိုးဝင်ရောက်လာသည့် စစ်အုပ်စု တပ်ကို သရက်ခရိုင်တပ်ရင်း (၄) က ကြားဖြတ်တိုက်ခိုက်ခဲ့ရာ စစ်အုပ်စုတပ်သား ၁၅ ဦးကို သုံ့ပန်းအဖြစ် ထပ်မံဖမ်းဆီးရမိခဲ့ပြီး သေနတ် ၁ လက် သိမ်းဆည်းရမိခဲ့သည်။ ယင်းမတိုင်းမီ မေ ၂၉ ရက်နေ့ကလည်း နတ်မောက်ဆက်သွယ်ရေးတပ်မှ ဒုတပ်ကြပ် ရန်နိုင်ကို စစ်ဆင်ရေးနယ်မြေအတွင်း ဖမ်းဆီးနိုင်ခဲ့ ကြောင်း PDF က ဆိုသည်။

မေလ ၂၂ ရက်နေ့တွင်လည်း မိတ္ထီလာအခြေစိုက် တပ်မ (၉၉) မှ ချောက်မြို့ရှိ ကပစ -၂၁ သို့ ထွက်ခွာလာသည့် စစ်ယာဉ် ငါး စီးပါ ယာဉ်တန်းကို မကွေးခရိုင်စစ်ဌာနကွပ်ကဲမှုအောက်ရှိ တပ်ရင်းများက လက်နက်ငယ်များဖြင့် ခြုံခိုပစ်ခတ်တိုက်ခိုက်ခဲ့ကြောင်း စစ်ရုံးချုပ်၏ ထုတ်ပြန်ချက် အရသိရသည်။

ထို့အတူ မေလ ၂၆ ရက်နေ့တွင်လည်း ဆိပ်ဖြူမြို့မှတစ်ဆင့် ကပစ-၂၁ သို့ အင်အားဖြည့်တင်းရန် ဦးတည်ထွက်ခွာလာသည့် စစ်ယာဉ်တန်းကို မိုင်းဆွဲတိုက်ခိုက်ခဲ့ရာ စစ်အုပ်စုပိုင်ယာဉ် နှစ် စီး ပြင်းထန်စွာ ပျက်စီးသွားခဲ့သည်။

ယင်းနေ့တွင်ပင် ချောက်မြို့အခြေစိုက် ခလရ-၁၃ မှ ထွက်ခွာလာသော စစ်အုပ်စု၏ ခဲယမ်း သယ်ဆောင်သည့် ယာဉ် နှစ် စီးကိုလည်း PDF တပ်ရင်းများက ထပ်မံ ခြုံခိုတိုက်ခိုက်နိုင်ခဲ့ကြောင်း သိရသည်။

စစ်ရေးအခြေအနေများနှင့် ပတ်သက်၍ မေလစတုတ္ထပတ်အတွင်း ပုံတောင်တောင်ကြောမှတစ်ဆင့် ဂန့်ဂေါခရိုင်အတွင်းသို့ ကျူးကျော်ဝင်ရောက်လာသည့် အင်အား ၁,၀၀၀ ခန့်ရှိ အာဏာလုစစ်အုပ်စု၏ စစ်ကြောင်းများနှင့် ၎င်းတို့၏ ယာယီအထိုင်စခန်းများကိုလည်း PDF က ထိရောက်စွာ ကြားဖြတ် တိုက်ခိုက်မှုများ ဆောင်ရွက်ခဲ့ကြောင်း ထုတ်ပြန်ချက်တွင် ဖော်ပြထားသည်။

ပြည်သူ့ကာကွယ်ရေးတပ်မတော် (PDF) အနေဖြင့် အာဏာလုစစ်အုပ်စုအား စစ်မျက်နှာအသီးသီးတွင် ရွံ့ရွံ့ချွံချွံ တိုက်ပွဲဝင်လျက်ရှိပြီး မိဘပြည်သူများအနေဖြင့်လည်း မိမိတို့၏ တော်လှန်ရေးတပ်ဖွဲ့ဝင်များကို တတ်စွမ်းသရွေ့ ဆက်လက်ကူညီဖေးမပေးကြပါရန် PDF က မေတ္တာရပ်ခံထားသည်။

ဓာတ်ပုံ-PDF