အီရန်ကို ထိန်းချုပ်ရန် တရုတ်ကို ပင်လယ်ကွေ့နိုင်ငံများ မျှော်လင့်

PSM (News)

ဇူလိုင် ၃၀၊ ၂၀၂၆

အရှေ့အလယ်ပိုင်းတွင် စစ်ပွဲများ တကျော့ပြန် ပြင်းထန်လာမှုကြောင့် တရုတ်နိုင်ငံအနေဖြင့် အီရန်အပေါ် ၎င်း၏ စီးပွားရေး သက်ရောက်မှုကို အသုံးပြု၍ ပင်လယ်နီနှင့် ဟော်မုဇ်ရေလက်ကြားများကို ဖွင့်လှစ်ပေးရန် ပင်လယ်ကွေ့ အာရပ်နိုင်ငံများက တောင်းဆိုနေကြသည်။

ယခုတောင်းဆိုမှုသည် ပေကျင်း၏ ဒေသတွင်း သြဇာအပေါ် စမ်းသပ်မှုတစ်ခု ဖြစ်လာသည်။

အမေရိကန်နှင့် အစ္စရေးတို့က အီရန်ကို တိုက်ခိုက်ခဲ့သည့် ဖေဖော်ဝါရီလ ၂၈ ရက်နေ့မှစ၍ စစ်ပွဲများမှာ ဆက်တိုက် ဖြစ်ပွားနေသည်။ တရုတ်နိုင်ငံသည် အီရန်၏ အကြီးဆုံး ကုန်သွယ်ဖက်ဖြစ်ပြီး ပင်လယ်ကွေ့နိုင်ငံများမှ ရေနံကို အဓိက ဝယ်ယူသူဖြစ်သည်။ ထို့ကြောင့် ပင်လယ်ကွေ့ အစိုးရများသည် ဝါရှင်တန်ထက် တရုတ်က တီဟီရန်ကို စေ့စပ်ညှိနှိုင်းမှုဖြင့် အဖြေရှာရန် ပိုမိုလမ်းညွှန်ပေးနိုင်လိမ့်မည်ဟု ယုံကြည်ကြသည်။

သို့သော်လည်း ပေကျင်းသည် မည်သည့်ဘက်ကိုမဆို ဘက်လိုက်ခြင်းဖြင့် သံတမန်ရေးရာ ထိခိုက်မှုများ ကြုံတွေ့ရမည်ကို စိုးရိမ်သဖြင့် တီဟီရန်၏ ခြိမ်းခြောက်မှုများကို လူသိရှင်ကြား ဆန့်ကျင်ခြင်းမှ ရှောင်ကြဉ်နေသည်။ အမေရိကန်က ကိစ္စရပ်ထဲ တိုက်ရိုက်ပါဝင်လာချိန်တွင် ပေကျင်း၏ တွက်ချက်မှုများသည် ပင်လယ်ကွေ့ထက် ကျော်လွန်ကာ ဝါရှင်တန်နှင့် ၎င်း၏ ပိုမိုကျယ်ပြန့်သော ဆက်ဆံရေးနှင့် ပြိုင်ဆိုင်မှုကို လွှမ်းခြုံလာသည်။

တရုတ်နိုင်ငံသည် ယီမင်နိုင်ငံရှိ ဟူသီလှုပ်ရှားမှုနှင့် တိုက်ရိုက် ဆွေးနွေးမှုများ ပြုလုပ်ခဲ့ပြီး ၎င်းတို့၏ ရေနံတင်သင်္ဘောများ တိုက်ခိုက်ခံရခြင်း မရှိဘဲ ပင်လယ်နီကို ဖြတ်သန်းသွားလာနိုင်ရန် စီစဉ်ပေးခဲ့သည်။ သို့သော်လည်း ၎င်း၏ သြဇာသည် အတိုင်းအတာတစ်ခုအထိသာ ရှိကြောင်းနှင့် စစ်ပွဲသည် အမေရိကန်အပေါ် ဖိအားများ သက်ရောက်စေခြင်းဖြင့် တရုတ်၏ အကျိုးစီးပွားကိုလည်း အထောက်အကူပြုနိုင်သည်ကို ပင်လယ်ကွေ့နိုင်ငံများက သတိပြုမိထားသည်။

ပေကျင်းသည် ဟော်မုဇ်ရေလက်ကြားကို ပြန်လည်ဖွင့်လှစ်ရန် စစ်ရေးအင်အားကို အသုံးပြုရန် အသင့်မရှိကြောင်းနှင့် အခြားနိုင်ငံများကလည်း ထိုသို့ ပြုလုပ်နိုင်မည်ဟု မယုံကြည်ကြောင်း ပြောကြားခဲ့သည်။ ယင်းအစား သံတမန်ရေးနှင့် ဆွေးနွေးမှုများ၊ လုံခြုံရေးနှင့် နိုင်ငံတကာ သင်္ဘောလမ်းကြောင်းများ လွတ်လပ်စွာ စီးဆင်းမှုတို့ကို တောင်းဆိုထားသည်။

ကိုးကား-Reuters