ညောင်ဦးမှ တောင်သာသို့ ထိုးလာသည့် အာဏာလု စစ်အုပ်စုစစ်ကြောင်း ဖြတ်တောက်တိုက်ခိုက်ခံရသဖြင့် ၁၀ ဦးထက်မနည်း သေဆုံးပြီး လက်နက်ခဲယမ်းများ သိမ်းဆည်းရမိ

‎PSM(News)

ဇွန် ၃၊ ၂၀၂၆

မန္တလေးတိုင်း၊ ညောင်ဦးမြို့နယ်မှတစ်ဆင့် တောင်သာမြို့နယ်အတွင်းသို့ စစ်ကြောင်းထိုး ဝင်ရောက်လာသည့် အာဏာလုအစိုးရ စစ်တပ်ကို တော်လှန်ရေးပူးပေါင်းတပ်ဖွဲ့များက ဖြတ်တောက်တိုက်ခိုက်ခဲ့ရာ တပ်ဖွဲ့ဝင် ၁၀ ဦးထက်မနည်း သေဆုံးပြီး လက်နက်ခဲယမ်းအချို့ သိမ်းဆည်းရမိခဲ့ကြောင်း ပြည်သူ့လွတ်မြောက်ရေးတပ် မတော် (PLA) ထံမှ သိရသည်။

ပြီးခဲ့သည့် မေလ ၃၁ ရက်နေ့မှစတင်ကာ ညောင်ဦးမြို့နယ်၊ တောပြားကျေးရွာဘက်မှတစ်ဆင့် ငါ့သရောက် – ဝဲလောင် လမ်းမကြီးအတိုင်း အင်အား ၃၀၀ ခန့်ဖြင့် တောင်သာမြို့နယ်အတွင်းရှိ တံတားကျေးရွာသို့ စစ်ကြောင်းထိုး ဝင်ရောက်လာသဖြင့် တော်လှန်ရေးပူးပေါင်းတပ်ဖွဲ့များနှင့် စတင်ကာ ထိတွေ့တိုက်ပွဲ ဖြစ်ပွားခဲ့ခြင်း ဖြစ်သည်။

“မေလ ၃၁ ရက်နေ့က သူတို့ (စစ်တပ်) တံတားကျေးရွာထဲ ဝင်ပြီး အဓမ္မတပ်စွဲခဲ့တယ်။ အဲဒီနောက် ဇွန်လ ၁ ရက်နေ့မှာ စစ်ကြောင်း ပြန်ထွက်လာချိန် တံတားရွာအရှေ့ဘက်မှာ ကျွန်တော်တို့ဘက်က ဖြတ်တောက်ပြီး ထိတွေ့တိုက်ပွဲ ထပ်မံဖြစ်ပွားခဲ့တာပါ” ဟု ပြည်သူ့လွတ်မြောက်ရေးတပ်မတော် (PLA) မှ တာဝန်ရှိသူက ဆိုသည်။

တံတားကျေးရွာအရှေ့ဘက်တွင် ဇွန် ၁ ရက်နေ့ ဖြစ်ပွားခဲ့သော တိုက်ပွဲအတွင်း အာဏာလုစစ်အုပ်စု တပ်ဖွဲ့ဝင် ၁၀ ဦးထက်မနည်း သေဆုံးသွားသည်ကို မြေပြင်၌ မျက်မြင်အတည်ပြုနိုင်ခဲ့ပြီး လက်နက်ခဲယမ်းများနှင့် စစ်အသုံးအဆောင်ပစ္စည်းအချို့ကိုလည်း တော်လှန်ရေးပူးပေါင်းတပ်ဖွဲ့များက သိမ်းဆည်းရမိခဲ့ကြောင်း သိရသည်။

‎

“လက်ရှိ စစ်ရေးအခြေအနေကတော့ အဲဒီနောက်ပိုင်း တိုက်ပွဲထပ်ဖြစ်တာတော့ မရှိသေးဘူး။ လောလောဆယ်မှာတော့ ရန်သူ့စစ်ကြောင်းဟာ မုံရိုးကျေးရွာတွင်း ရောက်ရှိနေတယ်လို့ သိရပါတယ်” ဟု PLA တာဝန်ရှိသူက မြေပြင်စစ်ရေးအခြေအနေနှင့်ပတ်သက်၍ ဆက်လက်ရှင်းပြသည်။

အဆိုပါ စစ်ကြောင်းထိုးလာသည့်တပ်မှာ ညောင်ဦးမြို့နယ်အခြေစိုက် ခြေလျင်တပ်ရင်း (ခလရ – ၄၁၅) ဖြစ်ပြီးပခုက္ကူအခြေစိုက် တပ်မ (၁၀၁) နှင့် အောင်သာရွာအခြေစိုက် ပျူစောထီးအဖွဲ့များနှင့် ပူးပေါင်းကာ ပြီးခဲ့သည့်ရက်ပိုင်းက မြစ်ခြေမြို့ကို စစ်ကြောင်းထိုးဝင်ရောက်၍ နေအိမ်များကို မီးရှို့ဖျက်ဆီးခဲ့သည်။

အဆိုပါစစ်ကြောင်းသည် ဒေသခံအရပ်သား ပြည်သူ ၂၀ ကျော်ကိုလည်း ရက်ရက်စက်စက် အစုလိုက်အပြုံလိုက် သတ်ဖြတ်ခဲ့သည့် စစ်ရာဇဝတ်မှုကျူးလွန်ထားသော စစ်ကြောင်းဖြစ်ကြောင်း သိရသည်။

ဓာတ်ပုံ-PLA