အီရန်စစ်ပွဲ၏ နောက်ဆက်တွဲဂယက်များ ပြန့်နှံ့လာသဖြင့် တရုတ်နိုင်ငံက စွမ်းအင်ဖူလုံရေးနှင့် နည်းပညာကဏ္ဍကို ဦးစားပေးလုပ်ဆောင်ရန် ဆုံးဖြတ်

PSM(NEWS)

ဧပြီ ၂၉၊ ၂၀၂၆

အစ္စရေး-အမေရိကန်နှင့် အီရန်တို့အကြား ဖြစ်ပွားနေသော စစ်ပွဲကြောင့် စီးပွားရေးအပေါ် သက်ရောက်မှုများ စတင်လာချိန်တွင် တရုတ်နိုင်ငံ၏ ထိပ်တန်းခေါင်းဆောင်ပိုင်းက နိုင်ငံ၏ စွမ်းအင်လုံခြုံရေးကို မြှင့်တင်ရန်နှင့် နည်းပညာဆိုင်ရာ ကိုယ်ပိုင်ရပ်တည်နိုင်မှုကို အရှိန်အဟုန်ဖြင့် ဖော်ဆောင်သွားမည်ဖြစ်ကြောင်း အင်္ဂါနေ့တွင် ကတိပြုလိုက်သည်။

ကမ္ဘာ့ဒုတိယအကြီးဆုံး စီးပွားရေးနိုင်ငံဖြစ်သော တရုတ်နိုင်ငံသည် ၂၀၂၆ ခုနှစ်၏ ပထမသုံးလပတ်တွင် ၅.၀ ရာခိုင်နှုန်း တိုးတက်မှုရှိခဲ့ပြီး သတ်မှတ်ချက်အတွင်း ရှိနေသော်လည်း လောင်စာဆီနှင့် ကုန်ကြမ်းစျေးနှုန်းများ မြင့်တက်လာမှုမှာ စက်ရုံအလုပ်ရုံများအတွက် စိန်ခေါ်မှုဖြစ်လာနေသည်။

တရုတ်ကွန်မြူနစ်ပါတီ၏ ထိပ်တန်းဆုံးဖြတ်ချက်ချမှတ်ရေးအဖွဲ့ဖြစ်သော ပေါ်လစ်ဗျူရို က ယခုနှစ် စီးပွားရေးအခြေအနေမှာ ခန့်မှန်းထားသည်ထက် ပိုမိုကောင်းမွန်ခဲ့ကြောင်း Xinhua သတင်းဌာနမှတစ်ဆင့် ပြောကြားခဲ့သည်။ သို့သော်လည်း ပြင်ပမှလာသော စိန်ခေါ်မှုများကို စနစ်တကျတုံ့ပြန်ရန်နှင့် စွမ်းအင်အရင်းအမြစ် လုံခြုံရေးကို အဆင့်မြှင့်တင်ရန် လိုအပ်ကြောင်း ထည့်သွင်းပြောဆိုခဲ့သည်။

စီးပွားရေးပညာရှင်များ၏ အဆိုအရ တရုတ်နိုင်ငံသည် ရေနံအရန်သင့်စုဆောင်းထားရှိမှု၊ ကျောက်မီးသွေးကို အဓိကအသုံးပြုမှုနှင့် ပြန်လည်ပြည့်ဖြိုးမြဲစွမ်းအင် (နေရောင်ခြည်နှင့် လေစွမ်းအင်) ကဏ္ဍတွင် အားကောင်းမှုတို့ကြောင့် အခြားနိုင်ငံများထက် စစ်ပွဲဒဏ်ကို ပိုမိုခံနိုင်ရည်ရှိနေခြင်းဖြစ်သည်။

တရုတ်အစိုးရအနေဖြင့် ဘဏ္ဍာရေးဆိုင်ရာ တင်းကျပ်မှုမရှိသော မူဝါဒကို ဆက်လက်ကျင့်သုံးသွားမည်ဖြစ်သော်လည်း လတ်တလောတွင် ကြီးမားသော စီးပွားရေးလှုံ့ဆော်မှု အစီအစဉ်အသစ်များ ပြုလုပ်ရန် အစီအစဉ်မရှိသေးကြောင်း သိရသည်။ သို့သော်လည်း အီရန်စစ်ပွဲ၏ ရိုက်ခတ်မှုကြောင့် ပို့ကုန်ကဏ္ဍ ကျဆင်းလာပါက မူဝါဒပိုင်းဆိုင်ရာ ပံ့ပိုးမှုများ ထပ်မံပြုလုပ်လာနိုင်ကြောင်း ခန့်မှန်းရသည်။

ကိုးကား-Reuters