OPEC မှ နုတ်ထွက်မည်ဟု အာရပ်စော်ဘွားများပြည်ထောင်စု (UAE) ကြေညာ

PSM(NEWS)

ဧပြီ ၂၉၊ ၂၀၂၆

အာရပ်စော်ဘွားများပြည်ထောင်စု (UAE) သည် လာမည့် မေလ ၁ ရက်နေ့မှစတင်၍ ရေနံတင်ပို့သည့်နိုင်ငံများအဖွဲ့ (OPEC) မှ နုတ်ထွက်တော့မည်ဖြစ်ကြောင်း အင်္ဂါနေ့တွင် ကြေညာလိုက်သည်။ ဤဆုံးဖြတ်ချက်ကြောင့် ကမ္ဘာ့ရေနံဈေးကွက်ကို ထိန်းချုပ်မောင်းနှင်နေသည့် OPEC အဖွဲ့အတွင်းမှ အဓိကရေနံထုတ်လုပ်သူတစ်ဦး လျော့နည်းသွားမည်ဖြစ်ပြီး ကမ္ဘာ့ရေနံရောင်းလိုအားနှင့် ဈေးနှုန်းအပေါ် အဖွဲ့၏ လွှမ်းမိုးနိုင်စွမ်းကိုလည်း ပိုမိုအားနည်းသွားစေမည်ဖြစ်သည်။

UAE ၏ ဤဆုံးဖြတ်ချက်သည် ကြာမြင့်စွာကတည်းက သတင်းများထွက်ပေါ်နေခဲ့ခြင်းဖြစ်သည်။ အဓိကအချက်များမှာ –

ထုတ်လုပ်မှုကန့်သတ်ချက် (Quotas): OPEC က သတ်မှတ်ထားသည့် ရေနံထုတ်လုပ်မှု ပမာဏကန့်သတ်ချက်များသည် နည်းပါးလွန်းသည်ဟု UAE က ယူဆနေပြီး မိမိတို့ အလိုရှိသလောက် ရေနံကို ကမ္ဘာ့ဈေးကွက်သို့ တင်ပို့ခွင့်မရသည့်အပေါ် မကျေမနပ်ဖြစ်နေခဲ့သည်။

ဒေသတွင်းနိုင်ငံရေး: OPEC ၏ အင်အားအကြီးဆုံးဖြစ်သော ဆော်ဒီအာရေးဘီးယားနှင့် UAE အကြား နိုင်ငံရေးနှင့် စီးပွားရေးဆိုင်ရာ သဘောထားကွဲလွဲမှုများ ပိုမိုပြင်းထန်လာခဲ့သည်။ အထူးသဖြင့် အီရန်နှင့် ဖြစ်ပွားနေသည့် စစ်ပွဲအတွင်း နှစ်နိုင်ငံစလုံး တိုက်ခိုက်ခံခဲ့ရသော်လည်း ဆက်ဆံရေးမှာမူ ဆက်လက်အေးစက်နေခဲ့သည်။

UAE သည် ၁၉၆၇ ခုနှစ်တွင် အဘူဒါဘီစော်ဘွားနယ်အဖြစ် OPEC သို့ စတင်ဝင်ရောက်ခဲ့ပြီး ၁၉၇၁ ခုနှစ်တွင် နိုင်ငံအဖြစ် စတင်တည်ထောင်ကတည်းက အဖွဲ့ဝင်ဖြစ်ခဲ့သည်။ ပြီးခဲ့သည့် ဖေဖော်ဝါရီ ၂၈ ရက်တွင် အမေရိကန်နှင့် အစ္စရေးတို့က အီရန်အပေါ် စစ်ပွဲစတင်ခဲ့ချိန်အထိ UAE သည် တစ်ရက်လျှင် ရေနံစိမ်းစည်ပေါင်း ၃.၄ သန်းခန့် ထုတ်လုပ်နေသည့် နိုင်ငံဖြစ်သည်။

UAE အစိုးရပိုင် WAM သတင်းဌာနမှတစ်ဆင့် ထုတ်ပြန်ရာတွင် ရုရှားက ဦးဆောင်ပြီး ရေနံဈေးနှုန်း တည်ငြိမ်ရန် ကြိုးပမ်းနေသည့် OPEC+ အဖွဲ့မှလည်း နုတ်ထွက်မည်ဟု ဆိုသည်။

“ဒီဆုံးဖြတ်ချက်ဟာ UAE ရဲ့ ရေရှည် မဟာဗျူဟာမြောက် စီးပွားရေး မျှော်မှန်းချက်နဲ့ ပြည်တွင်းစွမ်းအင် ထုတ်လုပ်မှုမှာ ရင်းနှီးမြှုပ်နှံမှုတွေ ပိုမိုတိုးမြှင့်သွားဖို့ ပြင်ဆင်နေတဲ့ စွမ်းအင်ကဏ္ဍ အပြောင်းအလဲကို ဖော်ပြနေတာဖြစ်ပါတယ်” ဟု UAE အစိုးရက ထုတ်ပြန်ထားသည်။

ကိုးကား-AP