ဆောမြို့နယ်တွင် တိုက်ပွဲဖြစ်ပွားခြင်းမရှိဘဲ အာဏာလုစစ်အုပ်စုက လေကြောင်းမှ ဗုံးကြဲ၍ အရပ်သား ၄ ဦး သေဆုံး

‎PSM(News)

ဇွန် ၂၈၊ ၂၀၂၆

မကွေးတိုင်း၊ ဂန့်ဂေါခရိုင်၊ ယောဒေသ ဆောမြို့နယ်အတွင်းသို့ အာဏာလုစစ်အုပ်စုက လေကြောင်းမှ ဗုံးကြဲတိုက်ခိုက်ခဲ့သည့်အတွက် အရပ်သား လေးဦး သေဆုံးပြီး ရှစ်ဦး ဒဏ်ရာရရှိသွားကြောင်း ဂန့်ဂေါခရိုင်တပ်ရင်း (၆) ထံမှ သိရသည်။

အာဏာလုအစိုးရစစ်တပ်သည် ယမန်နေ့ ဇွန် ၂၇ ရက် ညနေ ၅ နာရီ၃၀မိနစ်ကျော်ခန့်တွင် ဆောမြို့နယ်၊ နတ်ကောင်းကျင်းကျေးရွာနှင့် ရွာအနီးဝန်းကျင်တို့ကို တိုက်ပွဲဖြစ်ပွားခြင်းတစ်စုံတစ်ရာ မရှိဘဲ လေကြောင်းမှနေ၍ ဗုံးကြဲတိုက်ခိုက်ခဲ့ခြင်း ဖြစ်သည်။

လက်ရှိမြေပြင်စစ်ရေးအခြေအနေနှင့်ပတ်သက်၍ “ဆောနယ်ကနေ ချင်းပြည်နယ်ကို အင်အားထောင်ဂဏန်းလောက်နဲ့ စစ်ကြောင်းထိုးနေတာပါ။ ဆောကနေ ကန်ပက်လက်၊ ကျောက်ထုဘက်ကနေ မင်းတပ် စစ်ကြောင်း ၂ ကြောင်း ပါပါတယ်” ဟု ဂန့်ဂေါခရိုင်တပ်ရင်း (၆) မှ တာဝန်ရှိသူတစ်ဦးက PSM ကိုပြောသည်။

‎အဆိုပါ ဗုံးကြဲတိုက်ခိုက်မှုကြောင့် အရပ်သား လေးဦးသေဆုံးပြီး ရှစ်ဦး ဒဏ်ရာရကာ၊ ဒဏ်ရာရ သူ‎များတွင် စိုးရိမ်ရသူများပါဝင်နေပြီး အိမ်အချို့ မီးလောင် ပျက်စီးသွားကြောင်း ၎င်းက ဆက်လက် ပြောကြားသည်။

လက်ရှိတွင် အာဏာလုစစ်အုပ်စုသည် ဆောမြို့နှင့် လောင်းရှည်ကာကွယ်ရေးပစ္စည်းစက်ရုံ ကပစ-၂၅ သို့ စစ်အင်အားများ ဖြည့်တင်းပို့ဆောင်ကာ ထိုမှတစ်ဆင့် ချင်းပြည်နယ် ကန်ပက်လက်မြို့ဘက်သို့ စစ်ကြောင်းထိုးရန် ကြိုးပမ်းနေသဖြင့် တော်လှန်ရေးတပ်ဖွဲ့များ၏ ကြားဖြတ်တိုက်ခိုက်မှုကြောင့် တိုက်ပွဲများ ပြင်းထန်စွာ ဖြစ်ပွားလျက်ရှိသည်။

အဆိုပါ စစ်ရေးအခြေအနေများကြောင့် ပြည်သူများ ဘေးကင်းလုံခြုံစေရန်အတွက် သီးကုန်း-လောင်းရှည် လမ်းပိုင်း၊ ပိန်းချောင်း-လောင်းရှည် လမ်းပိုင်း နှင့် အင်ဘူး-လောင်းရှည် လမ်းပိုင်းများကို သွားလာခွင့် ယာယီပိတ်ထားကြောင်း ဂန့်ဂေါခရိုင် တပ်ရင်း (၆) က ဇွန်လ ၂၄ ရက်နေ့တွင် ဒေသန္တရကြေညာချက် ထုတ်ပြန်ထားသည်။

အာဏာလုစစ်အုပ်စုသည် ပြီးခဲ့သည့် ဧပြီလနှောင်းပိုင်းမှ စတင်ကာ ချင်းပြည်နယ်နှင့် နယ်မြေချင်း ထိစပ်နေသည့် ယောဒေသသို့ အင်အားထောင်ချီ ပို့လွှတ်ပြီး၊ ဆောမြို့နှင့် ကျောက်ထုမြို့တို့ကို အခြေပြုကာ ၎င်းတို့လက်လွှတ်ထားရသည့် ချင်းပြည်နယ်တောင်ပိုင်းရှိ ကန်ပက်လက်မြို့နှင့် မင်းတပ်မြို့တို့ကို ပြန်လည်ရရှိရန် ပြင်းထန်စွာ ထိုးစစ်ဆင်နေခြင်းဖြစ်ကြောင်း သိရသည်။