အီရန်တွင် ဆန္ဒပြမှုများနှင့်ပတ်သက်၍ သေဒဏ်ပေးမှုများ တိုးလာနိုင်ကြောင်း ကုလသမဂ္ဂလူ့အခွင့်အရေးအကြီးအကဲ သတိပေး

PSM(NEWS)

ဖေဖော်ဝါရီ ၂၈၊ ၂၀၂၆

အီရန်နိုင်ငံတွင် ဇန်နဝါရီလကဖြစ်ပွားခဲ့သော လူထုဆန္ဒပြမှုများနှင့်ဆက်စပ်ပြီးပထမဆုံးအကြိမ်အဖြစ် သေဒဏ်ချမှတ်ခဲ့ပြီးနောက်၊ နောက်ထပ်လူဒါဇင်နှင့်ချီ၍သေဒဏ်ပေးခံရမည့်အန္တရာယ်ရှိနေကြောင်းကုလသမဂ္ဂလူ့အခွင့်အရေးဆိုင်ရာမဟာမင်းကြီးဗိုကာတာ့ခ်က သတိပေးလိုက်သည်။

ဂျီနီဗာမြို့ရှိကုလသမဂ္ဂလူ့အခွင့်အရေးကောင်စီတွင် ပြောကြားသောမိန့်ခွန်း၌ ၎င်းက အီရန်တွင်သေဒဏ်ပေးမှုများကိုချက်ချင်းရပ်ဆိုင်းရန် တောင်းဆိုခဲ့သည်။

“ဆန္ဒပြမှုတွေနဲ့ပတ်သက်ပြီး အနည်းဆုံး လူရှစ်ယောက်၊အဲဒီထဲမှာကလေးနှစ်ယောက်လည်းပါဝင်ပါတယ်၊သူတို့ကိုသေဒဏ်ချမှတ်ထားတယ်ဆိုတဲ့သတင်းတွေကြောင့်ကျွန်တော် ထိတ်လန့်မိပါတယ်” ဟု တာ့ခ် က ပြောကြားခဲ့ပြီး၊ အခြားလူ ၃၀ ခန့်မှာလည်း သေဒဏ်ချမှတ်ခံရမည့်အန္တရာယ်ရှိနေကြောင်း ဖြည့်စွက်ပြောကြားခဲ့သည်။

တဟီရန်မြို့ရှိတော်လှန်ရေးတရားရုံးတစ်ခုမှ “ဘုရားသခင်ကိုရန်မူခြင်း”စွဲချက်ဖြင့်အီရန်အမျိုးသားတစ်ဦးကိုသေဒဏ်ချမှတ်ခဲ့ကြောင်း၊ယင်းပြစ်ဒဏ်ကိုအတည်ပြုပါကယခုနှစ်ဆန်းပိုင်းတွင် ဖြစ်ပွားခဲ့သော ဆန္ဒပြမှုများနှင့် ဆက်စပ်သည့်ပထမဆုံးသေဒဏ်ဖြစ်လာမည်ဖြစ်ကြောင်းသတင်းရင်းမြစ်များကဆိုသည်။

လူ့အခွင့်အရေးအဖွဲ့များ၏အဆိုအရ၊ ၁၉၇၉ ခုနှစ်အစ္စလာမ္မစ်တော်လှန်ရေးနောက်ပိုင်းအီရန်တွင်အဆိုးရွားဆုံးဖြစ်ပွားသောပြည်တွင်းမတည်ငြိမ်မှုများအတွင်းဆန္ဒပြသူများကိုဖြိုခွင်းရာ၌လူထောင်ပေါင်းများစွာသေဆုံးခဲ့သည်။ ယင်းဖြစ်စဉ်အတွင်း အမေရိကန်သမ္မတ ဒေါ်နယ်ထရမ့်ကအီရန်အနေဖြင့်သေဒဏ်ပေးမှုများလုပ်ဆောင်ပါကစစ်ရေးအရအရေးယူမည်ဟု သတိပေးထားသည်။

ထို့အပြင် တာ့ခ် က ဒေသတွင်း စစ်ရေးအရ ပိုမိုတင်းမာလာနိုင်သည့်အပေါ်စိုးရိမ်ကြောင်းနှင့်သင့်လျော်မျှတသောဆုံးဖြတ်ချက်များဖြစ်လာရန်မျှော်လင့်ကြောင်းပြောကြားခဲ့သည်။

ကိုးကား Reuters

#PSM_News

#သတိပေး

#ကုလသမဂ္ဂလူ့အခွင့်အရေး

#သေဒဏ်

#ဆန္ဒပြ

#အီရန်