နယူးဇီလန်နိုင်ငံ မြို့တော်တွင် မုန်တိုင်းဒဏ်ကြောင့် လေကြောင်းခရီးစဉ် ရာနှင့်ချီ၍ ဖျက်သိမ်းရ

PSM(NEWS)

ဇွန် ၂၇ ၊၂၀၂၆

သောကြာနေ့တွင် နယူးဇီလန်နိုင်ငံ အလယ်ပိုင်း၌ ပြင်းထန်သော မုန်တိုင်းတစ်ခု ဝင်ရောက်တိုက်ခတ်ခဲ့သည့်အတွက် မြို့တော် ဝယ်လင်တန်၏ လေကြောင်းသွားလာမှုများ ရပ်တန့်သွားခဲ့ပြီး အိမ်ထောင်စု ထောင်ပေါင်းများစွာ လျှပ်စစ်မီးပြတ်တောက်ခြင်း၊ ရေကြီးခြင်းနှင့် မြေပြိုခြင်းများ ဖြစ်ပေါ်ခဲ့သည်။

အမျိုးသား မိုးလေဝသခန့်မှန်းရေးဌာန (MetService) က လေဖိအားနည်းရပ်ဝန်းတစ်ခု ဖြတ်သန်းဝင်ရောက်လာသဖြင့် ပြင်းထန်သော ရာသီဥတုဆိုင်ရာ သတိပေးချက်များစွာကို ထုတ်ပြန်ထားသည်။

မိုးသည်းထန်စွာရွာသွန်းပြီး လေတိုက်နှုန်းမှာ တစ်နာရီလျှင် ၁၂၀ ကီလိုမီတာ (၇၄ မိုင်) အထိ ရှိနိုင်ကြောင်း သတိပေးထားသည်။ နိုင်ငံ၏ အချို့နေရာများတွင်မူ တစ်ညလုံး တိုက်ခတ်ခဲ့သည့် လေတိုက်နှုန်းမှာ တစ်နာရီလျှင် ၁၅၀ ကီလိုမီတာကျော်အထိ မှတ်တမ်းတင်ထားသည်။

မုန်တိုင်းကြောင့် ဝယ်လင်တန်လေဆိပ်တွင် လေကြောင်းခရီးစဉ် ၂၀၀ ကျော်ကို ဖျက်သိမ်းခဲ့ရသည်။

“ဝယ်လင်တန်လေဆိပ်ကို ဝင်ရောက်လာတဲ့၊ ထွက်ခွာသွားတဲ့ ခရီးစဉ်အများစုကို ဒီနေ့မှာ ဖျက်သိမ်းခဲ့ရပါတယ်” ဟု လေဆိပ်တာဝန်ရှိသူများက ပြောကြားခဲ့သည်။

Air New Zealand (AIR.NZ) လေကြောင်းလိုင်းကလည်း မြို့တော်သို့ ပျံသန်းသည့် ပြည်တွင်းခရီးစဉ်အားလုံးနှင့် နယူးပလိုင်းမောက် လေဆိပ်မှ ပျံသန်းသည့် ခရီးစဉ်အားလုံးကို ဖျက်သိမ်းလိုက်ကြောင်း အတည်ပြုခဲ့သည်။

“ခရီးစဉ်တွေကို ဘေးကင်းလုံခြုံတဲ့အချိန်မှာပဲ ပြန်လည်စတင်ပါမယ်” ဟု လေကြောင်းလိုင်းက ပြောကြားသည်။

ဝယ်လင်တန်လျှပ်စစ်ဓာတ်အားပေးလုပ်ငန်းက လျှပ်စစ်ဓာတ်အား သုံးစွဲသူ ၄,၀၀၀ ခန့် မီးပြတ်တောက်ခဲ့ကြောင်းနှင့် ညနေပိုင်းတွင် လေတိုက်နှုန်း ပိုမိုပြင်းထန်လာနိုင်သဖြင့် မီးပြတ်တောက်မှုများ ထပ်မံဖြစ်ပွားနိုင်ကြောင်း သတိပေးထားသည်။ လျှပ်စစ်မီး ပြန်လည်ရရှိစေရန် ရက်အနည်းငယ် သို့မဟုတ် လာမည့်အပတ် အလယ်ပိုင်းအထိ ကြာမြင့်နိုင်ကြောင်းလည်း ဆိုသည်။

ဝယ်လင်တန်၏အရှေ့မြောက်ဘက်ရှိ လိုးဝါးဟတ်မြို့တွင် လမ်းမများ ရေကြီးခြင်းနှင့် မြေပြိုမှု နှစ်ခု ဖြစ်ပွားခဲ့ကြောင်း တာဝန်ရှိသူများက အစီရင်ခံတင်ပြထားသည်။

ကိုးကား-Reuters