ဒေါ်အောင်ဆန်းစုကြည်အား ခြွင်းချက်မရှိ ချက်ချင်းလွှတ်ပေးရန် APHR နှင့် သားငယ် ကိုထိန်လင်းတို့ တောင်းဆို

PSM(NEWS)

ဇွန် ၂၆၊ ၂၀၂၆

အာဆီယံ လူ့အခွင့်အရေးဆိုင်ရာ လွှတ်တော်အမတ်များအဖွဲ့ (APHR) သည် မြန်မာ့ဒီမိုကရေစီခေါင်းဆောင် ဒေါ်အောင်ဆန်းစုကြည်အား လွှတ်မြောက်ရေးနှင့် နိုင်ငံရေးအကျဉ်းသားများအားလုံး ပြန်လွှတ်ပေးရေးအတွက် စုပေါင်းဖိအားပေးမှုများ တိုးမြှင့်ရန် ရည်ရွယ်ချက်ဖြင့် ဒေါ်အောင်ဆန်းစုကြည်၏ သားငယ်ဖြစ်သူ ကိုထိန်လင်းနှင့် ဇွန်လ ၂၃ရက်နေ့တွင် တွေ့ဆုံဆွေးနွေးခဲ့သည်။

အဆိုပါတွေ့ဆုံပွဲသည် ဩစတြေးလျ၊ ကမ္ဘောဒီးယား၊ အင်ဒိုနီးရှား၊ အီတလီ၊ မလေးရှား၊ မြန်မာ၊ ဖိလစ်ပိုင်၊ စင်ကာပူ၊ တောင်အာဖရိက၊ ထိုင်းနှင့် တီမောလက်စတေနိုင်ငံတို့မှ ယခင်နှင့် လက်ရှိ လွှတ်တော်အမတ် ၁၃၄ ဦး လက်မှတ်ရေးထိုးထားသော ပွင့်လင်းမြင်သာသည့် အိတ်ဖွင့်ပေးစာတစ်စောင်ကို တင်သွင်းပြီးနောက် ဖြစ်ပေါ်လာခြင်းဖြစ်သည်။

အဆိုပါပေးစာတွင် အာဆီယံဥက္ကဋ္ဌနှင့် အစိုးရခေါင်းဆောင်များအနေဖြင့် စစ်ကောင်စီ၏ ဖမ်းဆီးထားခြင်းခံရသော ဒေါ်အောင်ဆန်းစုကြည်နှင့် နိုင်ငံရေးအကျဉ်းသားများအားလုံးကို ခြွင်းချက်မရှိ ချက်ချင်းပြန်လွှတ်ပေးရန် တောင်းဆိုထားသည်။ ထို့ပြင် ဒေါ်အောင်ဆန်းစုကြည်၏ ကျန်းမာရေးအခြေအနေကို လူသိရှင်ကြား သက်သေပြရန်၊ မိသားစုဝင်များ၊ ရှေ့နေများနှင့် လွတ်လပ်သော ဆေးကုသရေးအဖွဲ့များက သူမ၏ လက်ရှိနေရာနှင့် အခြေအနေကို ချက်ချင်းဝင်ရောက်ကြည့်ရှုခွင့်ပြုရန်လည်း တောင်းဆိုထားသည်။

စစ်ကောင်စီသည် နိုင်ငံတကာ၏ တာဝန်ယူမှု၊ တာဝန်ခံမှုများကို ရှောင်လွှဲရန်နှင့် နိုင်ငံရေးအရ အပေးအယူများ ရယူနိုင်ရန်အတွက် မိခင်ဖြစ်သူကို ဓားစာခံအဖြစ် အသုံးပြုနေခြင်းဖြစ်ကြောင်း ကိုထိန်လင်းက သတိပေးပြောကြားသည်။ အသက် ၈၁ နှစ်အရွယ်ရှိပြီဖြစ်သော ဒေါ်အောင်ဆန်းစုကြည်သည် ၂၀၂၁ ခုနှစ် ဖေဖော်ဝါရီလ အာဏာသိမ်းချိန်မှစ၍ ဖမ်းဆီးထိန်းသိမ်းခံထားရခြင်းဖြစ်ပြီး၊ သူမ၏ ကျန်းမာရေးအခြေအနေနှင့် လက်ရှိနေရာကို လွတ်လပ်စွာ အတည်ပြုနိုင်ခြင်း မရှိသေးပေ။ လွန်ခဲ့သည့် သုံးနှစ်နီးပါးက မိခင်ထံမှ ရရှိခဲ့သော စာတစ်စောင်သာ နောက်ဆုံးအကြိမ် ဆက်သွယ်ခွင့်ရရှိခဲ့ကြောင်း ကိုထိန်လင်းက ပြောကြားခဲ့သည်။

ကိုးကား-APHR Statement