PSM(NEWS) မတ် ၂၅၊၂၀၂၆ အမေရိကန်ပြည်ထောင်စုနှင့်အီရန်နိုင်ငံတို့အကြားကာတာနိုင်ငံအနေဖြင့်တိုက်ရိုက်ကြားဝင်စေ့စပ်ပေးနေခြင်းမရှိသော်လည်း စစ်ပွဲအဆုံးသတ်နိုင်ရေးအတွက်တရားဝင်နှင့်တရားမဝင်သံတမန်ရေးရာလမ်းကြောင်းအားလုံးကိုကာတာကထောက်ခံအားပေးလျက်ရှိကြောင်းကာတာနိုင်ငံခြားရေးဝန်ကြီးဌာနပြောရေးဆိုခွင့်ရှိသူကအင်္ဂါနေ့တွင် ပြောကြားခဲ့သည်။ အမေရိကန်ဘက်ကအီရန်နှင့်ဆွေးနွေးမှုများပြုလုပ်ခဲ့ပြီးနှစ်ဖက်စလုံးတွင်“အဓိကသဘောတူညီချက်များ” ရှိနေကြောင်း သမ္မတ ဒေါ်နယ်ထရန့်က တနင်္လာနေ့တွင် သတင်းထောက်များကိုပြောကြားခဲ့သော်လည်းအီရန်အစိုးရကမူမည်သည့်ဆွေးနွေးပွဲမျှ မပြုလုပ်ခဲ့ကြောင်း ငြင်းဆိုထားသည်။ ကာတာနိုင်ငံသည် အကျပ်အတည်းကို သံတမန်နည်းလမ်းဖြင့် ဖြေရှင်းနိုင်ရန် အမေရိကန်နှင့်အနီးကပ်ဆက်သွယ်ဆောင်ရွက်လျက်ရှိကြောင်း ပြောရေးဆိုခွင့်ရှိသူ မာဂျက်အယ်လ်အန်ဆာရီက ဒိုဟာမြို့၌ ပြုလုပ်သည့် သတင်းစာရှင်းလင်းပွဲတွင် ပြောကြားခဲ့သည်။ “ဒီကိစ္စနဲ့ပတ်သက်ပြီး ကျွန်တော်တို့ အမေရိကန်အစိုးရနဲ့အနီးကပ်ထိတွေ့ဆက်ဆံနေပါတယ်။သူတို့ကတော့ဒေသတွင်းလုံခြုံရေးနဲ့သက်ဆိုင်တယ်လို့ယူဆတဲ့စံနှုန်းတွေအပေါ်မူတည်ပြီးစစ်ပွဲဆင်နွှဲဖို့ဆုံးဖြတ်ခဲ့တာပါ” ဟု ၎င်းက ဆိုသည်။ ဆက်လက်၍၎င်းက“ဒါကသူတို့ရဲ့သုံးသပ်ချက်ဖြစ်ပေမဲ့ကျွန်တော်တို့ကတော့အခြေအနေတွေပြန်လည်တည်ငြိမ်လာဖို့၊အကျပ်အတည်းကနေလွတ်မြောက်မယ့်လမ်းစရှာဖို့နဲ့ကျွန်တော်တို့နိုင်ငံတွေအပေါ်တိုက်ခိုက်မှုတွေရပ်တန့်သွားဖို့အတွက်သူတို့နဲ့အလွန်နီးကပ်စွာ ပူးပေါင်းဆောင်ရွက်နေပါတယ်” ဟု ဖြည့်စွက်ပြောကြားခဲ့သည်။ ကမ္ဘာ့စွမ်းအင်ထောက်ပံ့မှုများကိုထိခိုက်စေခဲ့သည့်အမေရိကန်အစ္စရေးနှင့်အီရန်တို့ကြား စစ်မီးကို ငြိမ်းသတ်နိုင်ရန် အီဂျစ်၊ ပါကစ္စတန်နှင့် တူရကီနိုင်ငံတို့ကလည်း ကြားဝင်စေ့စပ်ရန် ကြိုးပမ်းနေကြသည်။ “ဒေသတွင်းမှာ အရှိန်မြင့်တက်လာနေတဲ့ ပဋိပက္ခတွေကို မထိန်းချုပ်နိုင်ရင် ဒါဟာ ဒေသတွင်းနိုင်ငံတွေဆီကူးစက်ရုံတင်မကဘဲ ကျွန်တော်တို့အားလုံးကိုဝါးမြိုသွားမယ့် စစ်ပွဲကြီးဖြစ်လာလိမ့်မယ်လို့၂၀၂၃ခုနှစ်ကတည်းက ကျွန်တော်တို့ ပြောခဲ့ဖူးပါတယ်။ အခုတော့ အဲဒီအခြေအနေကို အတိအကျ ရောက်နေပါပြီ” ဟု အယ်လ်အန်ဆာရီက ပြောကြားခဲ့သည်။ ကိုးကား Reuters Post navigation တစ်နှစ်ကျော်ကြာထိန်းသိမ်းခံထားရသည့် အမေရိကန်နိုင်ငံသား ဒန်းနစ်ကွိုင်ကို အာဖဂန်နစ္စတန် ပြန်လည်လွှတ်ပေး ကမ္ဘောဒီးယား-ထိုင်း နယ်စပ်ပဋိပက္ခကြောင့် နှစ်ပေါင်း ၁,၀၀၀ သက်တမ်းရှိ ရှေးဟောင်းဘုရားကျောင်း ပြိုကျပျက်စီးမည့်အန္တရာယ်နှင့် ရင်ဆိုင်နေရ
