ကလေးငယ်များ အိပ်ရာထဲတွင် ဗုံးကြဲခံနေရပြီး ဘုရားကျောင်းများကို စစ်ရေးပစ်မှတ်အဖြစ် တိုက်ခိုက်နေခြင်းသည် စနစ်တကျ ကျူးလွန်သည့် နိုင်ငံတော်အဆင့် အကြမ်းဖက်မှုဟု CHRO ပြော

PSM (News)

ဖေဖော်ဝါရီ ၂၀၊ ၂၀၂၆

ချင်းပြည်နယ်၏ မြို့တော် ဟားခါးတွင် ကျင်းပမည့် ချင်းအမျိုးသားနေ့ အခမ်းအနားကို အသုံးချ၍ ချင်းပြည် နယ်အတွင်းရှိ ကျေးရွာများကို လေကြောင်းမှ ဦးတည်တိုက်ခိုက်ခဲ့ကြောင်း ချင်းလူ့အခွင့်အရေးအဖွဲ့ (CHRO) က ထုတ်ပြန်သည်။

စစ်ကော်မရှင်သည် ယမန်နေ့ ဖေဖော်ဝါရီ ၁၉ ရက် နံနက်အစောပိုင်းက ချင်းပြည်နယ် ဟားခါးမြို့နယ်နှင့် ဖလမ်းမြို့နယ်များရှိ ကျေးရွာများကို လေကြောင်းတိုက်ခိုက်မှုများ ပြုလုပ်ခဲ့ကြောင်း ဒေသခံများထံမှ သိရသည်။

စစ်ကော်မရှင်သည် ပြည်သူများ အိပ်မောကျနေချိန် ဖေဖော်ဝါရီ ၁၉ ရက်နေ့ နံနက် ၁ နာရီမှ ၁ နာရီ ၃၀ မိနစ်အတွင်း ဟားခါးနှင့် ဖလမ်းမြို့နယ်တို့ရှိ ကျေးရွာ သုံးရွာကို ရည်ရွယ်ချက်ရှိရှိ ပစ်မှတ်ထား တိုက်ခိုက်ခဲ့ပြီးအဆိုပါ တိုက်ခိုက်မှုများကြောင့် ဘုရားကျောင်းများနှင့် လူနေအိမ်များ ပျက်စီးသွားကာ အရပ်သားများ ထိခိုက်ဒဏ်ရာရရှိခဲ့သည်။

စစ်ကော်မရှင်သည် နံနက် ၁ နာရီ ၂၈ မိနစ်ခန့်တွင် ဟားခါးမြို့နယ် စင်ခွာကျေးရွာကို လေကြောင်းမှ ဗုံးကြဲတိုက်ခိုက်ခဲ့ရာ စင်ခွာနှစ်ခြင်းခရစ်ယာန်ဘုရားကျောင်း (CBC) နှင့် ဗေသနိနှစ်ခြင်းခရစ်ယာန်ဘုရားကျောင်း (BBC) အနီးသို့ ကျရောက်ခဲ့သည်။

အဆိုပါ ဗုံးကြဲမှုကြောင့် အသက် ၅ နှစ်အရွယ် KG တန်း ကျောင်းသားကလေးငယ်တစ်ဦးနှင့် မိခင်ဖြစ်သူ အပါအဝင် စုစုပေါင်း ၅ ဦး ဒဏ်ရာရရှိခဲ့သည်။ ဒဏ်ရာရရှိသူများအနက် သက်ကြီးရွယ်အို အမျိုးသား ၂ ဦးမှာ စိုးရိမ်ရသည့် ဒဏ်ရာများရရှိသဖြင့် ဟားခါးဆေးရုံသို့ ပို့ဆောင်ထားရကြောင်း ဒေသခံများထံမှ သိရသည်။

ထို့ပြင် ဘုရားကျောင်း ၂ ကျောင်းနှင့် နေအိမ် ၇ လုံး ပျက်စီးခဲ့ပြီး အိမ်ခြေ ၂ လုံးမှာ လုံးဝ ပြာကျပျက်စီးခဲ့ကြောင်း CHRO ၏ ထုတ်ပြန်ချက်တွင် ဖော်ပြထားသည်။

ယင်းနောက် နံနက် ၁ နာရီ ၃၀ မိနစ်ခန့်တွင် ဖလမ်းမြို့နယ်ရှိ လုမ်ဗန်ကျေးရွာအတွင်းသို့ ဗုံး ၆ လုံး ကြဲချတိုက်ခိုက်ခဲ့ရာ နေအိမ်အများအပြား ပျက်စီးခဲ့ပြီး ၁ ဦး ဒဏ်ရာရရှိခဲ့သည်။

အလားတူ နံနက် ၁ နာရီခန့်က ဟားခါးမြို့နယ် ဇုတ်ခွာကျေးရွာအတွင်းသို့ ဗုံး ၃ လုံး ကြဲချခဲ့သဖြင့် လူနေအိမ်အများအပြား ထိခိုက်ပျက်စီးခဲ့ကြောင်း သိရသည်။

စစ်ကော်မရှင်သည် ထိုသို့ လေကြောင်းတိုက်ခိုက်မှုများ လုပ်ဆောင်နေသော်လည်း ဟားခါးမြို့တွင် ချင်းအမျိုးသားနေ့ အခမ်းအနားများကို ခမ်းနားစွာ ကျင်းပရန် ပြင်ဆင်နေခြင်းသည် နိုင်ငံတကာအသိုင်းအဝိုင်းကို အခြေအနေများ ပုံမှန်ဖြစ်နေသယောင် လှည့်စားရန် ကြိုးပမ်းခြင်းသာဖြစ်ကြောင်း CHRO က ဆိုသည်။

ကလေးငယ်များ အိပ်ရာထဲတွင် ဗုံးကြဲခံနေရပြီး ဘုရားကျောင်းများမှာ စစ်ရေးပစ်မှတ်သဖွယ် တိုက်ခိုက်ခံနေရသည့် အခြေအနေသည် စနစ်တကျ ကျူးလွန်သည့် နိုင်ငံတော်အဆင့် အကြမ်းဖက်မှုဖြစ်ပြီး၊ အဆိုပါ စစ်ရာဇဝတ်မှု ကျူးလွန်သူများကို ထိရောက်စွာ အရေးယူပေးရန် ချင်းလူ့အခွင့်အရေးအဖွဲ့ (CHRO) အနေဖြင့် နိုင်ငံတကာအသိုင်းအဝိုင်းသို့ တောင်းဆိုထားသည်။

ဓာတ်ပုံ – CHRO

#ချင်းပြည်နယ်

#လေကြောင်းတိုက်ခိုက်မှု

#စစ်ကော်မရှင်

#CHRO

#PSM_News