ရုရှား-ယူကရိန်းစစ်ပွဲတွင် ကျဆုံးခဲ့သည့် မြောက်ကိုရီးယားစစ်သည်မိသားစုများအတွက် နေအိမ်ရာသစ်တစ်ခုကို ကင်ဂျုံအွန် ဖွင့်လှစ်ပေး

PSM (NEWS)

ဖေဖော်ဝါရီ ၁၇၊ ၂၀၂၆

ရုရှားတပ်ဖွဲ့များနှင့် ပူးပေါင်းတိုက်ခိုက်ရင်း ကျဆုံးခဲ့သည့် မြောက်ကိုရီးယားစစ်သည်များ၏ မိသားစုများအတွက် ပြုံယမ်းမြို့တွင် လူနေအိမ်ရာသစ်တစ်ခု တည်ဆောက်ပြီးစီးသွားပြီဖြစ်ကြောင်း မြောက်ကိုရီးယားအစိုးရက တနင်္လာနေ့တွင် ထုတ်ပြန်ကြေညာခဲ့သည်။ ၎င်းသည် ကျဆုံးစစ်သည်များကို ဂုဏ်ပြုရန် ခေါင်းဆောင် ကင်ဂျုံအွန် ၏ နောက်ဆုံးကြိုးပမ်းမှုတစ်ရပ်လည်း ဖြစ်သည်။

နိုင်ငံပိုင်မီဒီယာမှ ထုတ်ပြန်သော ဓာတ်ပုံများတွင် ကင်ဂျုံအွန်သည် “ဆယ်ပြယ်လမ်း” (Saeppyol Street) ဟု အမည်ပေးထားသည့် လမ်းသစ်တစ်လျှောက် လမ်းလျှောက်နေသည်ကို တွေ့ရသည်။ ထို့အပြင် ထင်ရှားလာနေသည့် သမီးဖြစ်သူ ကင်ဂျူအေး လည်း အတူပါရှိပြီး၊ “မိခင်နိုင်ငံအတွက် အရာအားလုံးကို စတေးခဲ့ကြသည့် လူငယ်အာဇာနည်များ” ၏ ကျေးဇူးကို ပြန်လည်ပေးဆပ်သွားမည်ဟု ကတိပြုကာ မိသားစုအချို့ထံ သွားရောက်တွေ့ဆုံခဲ့သည်။

မကြာသေးမီလများအတွင်း မြောက်ကိုရီးယားသည် ယူကရိန်းစစ်ပွဲသို့ စေလွှတ်ထားသော တပ်ဖွဲ့ဝင်များကို ဂုဏ်ပြုသည့် ဝါဒဖြန့်လှုပ်ရှားမှုများကို အရှိန်မြှင့် ဆောင်ရွက်လာခဲ့သည်။ အထိမ်းအမှတ်နံရံနှင့် ပြတိုက်တည်ဆောက်ခြင်းတို့သည် ပြည်တွင်းစည်းလုံးညီညွတ်မှု မြှင့်တင်ရန်နှင့် လူထုအတွင်း ဖြစ်ပေါ်နိုင်သည့် မကျေနပ်မှုများကို ထိန်းချုပ်ရန် ကြိုးပမ်းမှုတစ်ရပ်ဖြစ်နိုင်ကြောင်း လေ့လာဆန်းစစ်သူများက သုံးသပ်ထားသည်။

ကင်ဂျုံအွန်သည် ဝါရှင်တန်နှင့် တင်းမာမှုများ ရှိနေသည့်အချိန်တွင် ရုရှားသမ္မတ ဗလာဒီမာ ပူတင် ကို အထောက်အပံ့ပေးရန် စစ်သည်ထောင်ပေါင်းများစွာနှင့် အမြောက်၊ ဒုံးကျည်များအပါအဝင် စစ်လက်နက်ကိရိယာ အများအပြားကို စေလွှတ်ပေးခဲ့ကြောင်း သတင်းများတွင် ဖော်ပြထားသည်။

တောင်ကိုရီးယား အမျိုးသားထောက်လှမ်းရေးဌာန (NIS) ၏ ပြီးခဲ့သည့်အပတ်က လွှတ်တော်သို့ တင်ပြချက်အရ ယူကရိန်းစစ်ပွဲအတွင်း မြောက်ကိုရီးယားစစ်သည် ၆,၀၀၀ ခန့် သေဆုံး သို့မဟုတ် ဒဏ်ရာရရှိခဲ့နိုင်ကြောင်း ခန့်မှန်းထားသော်လည်း သေဆုံးသူအရေအတွက် အတိအကျကိုမူ ထုတ်ဖော်ပြောကြားခြင်း မရှိသေးပါ။ ယခင်နှစ်တွင်မူ သေဆုံးသူ ၆၀၀ ခန့်ရှိနိုင်ကြောင်း ခန့်မှန်းခဲ့သည်။

တံခါးပိတ်ကျင်းပခဲ့သော ထိုရှင်းလင်းပွဲသို့ တက်ရောက်ခဲ့သည့် လွှတ်တော်အမတ်များ၏ ပြောကြားချက်အရ မြောက်ကိုရီးယားတပ်ဖွဲ့များသည် ယခုစစ်ပွဲမှတစ်ဆင့် ခေတ်သစ်စစ်ပွဲအတွေ့အကြုံများနှင့် ရုရှားထံမှ နည်းပညာဆိုင်ရာ အထောက်အပံ့များကို ရရှိနေပြီး ၎င်းတို့၏ လက်နက်စနစ်များ၏ စွမ်းဆောင်ရည်ကို မြှင့်တင်နိုင်မည်ဟု ထောက်လှမ်းရေးဌာနက ယုံကြည်ထားသည်။

အဆိုပါ လမ်းသစ်ဖွင့်လှစ်မှုသည် ယခုလနှောင်းပိုင်းတွင် ကျင်းပမည့် အာဏာရပါတီ၏ အဓိကညီလာခံမတိုင်မီ ပေါ်ပေါက်လာခြင်းဖြစ်သည်။ ထိုညီလာခံတွင် ကင်ဂျုံအွန်က လာမည့် ၅ နှစ်အတွင်း ကျင့်သုံးမည့် ပြည်တွင်းနှင့် ပြည်ပ မူဝါဒရည်မှန်းချက်များကို ကြေညာမည်ဖြစ်ပြီး ၎င်း၏ အာဏာစက်ကို ပိုမိုခိုင်မာစေရန် ခြေလှမ်းသစ်များ လုပ်ဆောင်လာနိုင်ကြောင်း ခန့်မှန်းထားသည်။

ကိုးကား – AP

#ရုရှားယူကရိန်းစစ်ပွဲ

#မြောက်ကိုရီးယား

#စစ်သည်မိသားစု

#နေအိမ်ရာသစ်တစ်ခု

#ကင်ဂျုံအွန်

#မူဝါဒရည်မှန်းချက်

#PSM_News