လားရှိုးမြို့ပေါ် ရပ်ကွက်များနှင့် အာဏာလုစစ်တပ်၏ ရမခ ဌာနချုပ်ထဲသို့ ရှော့ခ်တိုက်ဒုံးများ ကျရောက်ပေါက်ကွဲ၊ အမျိုးသမီး ၁ ဦး သေဆုံး

PSM(News)

ဇူလိုင် ၁၀၊ ၂၀၂၆

‎

ရှမ်းပြည်နယ်မြောက်ပိုင်း၊ လားရှိုးမြို့တွင်းရှိ ရပ်ကွက်များနှင့် အာဏာလုစစ်တပ်၏ အရှေ့မြောက် ပိုင်းတိုင်းစစ်ဌာနချုပ် (ရမခ) ထဲသို့ ရှော့ခ်တိုက်ဒုံးများ ကျရောက်ပေါက်ကွဲခဲ့ကြောင်း ရှမ်းမြောက်ရှိ စစ်ရေးသတင်းရင်းမြစ်ထံမှ သိရသည်။

ယမန်နေ့ ဇူလိုင် ၉ ရက် ညနေပိုင်းတွင် လားရှိုးမြို့ အမှတ် (၆) ရပ်ကွက်၊ အမှတ် (၁၀) ရပ်ကွက်နှင့် လားရှိုးမြို့အခြေစိုက် ရမခ တိုင်းစစ်ဌာနချုပ်အတွင်းသို့ ရှော့ခ်တိုက်ဒုံးများ ကျရောက်ပေါက်ကွဲခဲ့ခြင်း ဖြစ်သည်။

‎

လားရှိုးမြို့တွင်းသို့ ရှော့ခ်တိုက်ဒုံး လေး လုံး ကျရောက် ပေါက်ကွဲခဲ့ခြင်းဖြစ်ပြီး ရပ်ကွက် (၁၀) တွင် နေထိုင်သည့် အသက် (၃၈) နှစ်အရွယ် အမျိုးသမီးတစ်ဦး ထိမှန်သေဆုံးပြီး တစ်ဦး ထိခိုက်ဒဏ်ရရှိခဲ့ သည်။

‎

“လေး ငါး နေရာလောက်တော့ သိရတယ်။ ရပ်ကွက် ၆၊ ရပ်ကွက် ၁၀၊ ပြီးရင် တိုင်းထဲ (ရမခ) လည်း ကျတယ်လို့ ပြောတယ်။ သေဆုံးတာက ရပ်ကွက် ၁၀ က အမျိုးသမီးတစ်ယောက် သေတယ်။ ရပ်ကွက် ၆ က လူတစ်ယောက် ထိခိုက်ဒဏ်ရာရတယ်။ အိမ်တွေထိတာကတော့ ရပ်ကွက် ၆ က အိမ်တွေ ထိခိုက်ပျက်စီးတယ်” ဟု စစ်ရေးသတင်းရင်းမြစ်က PSM ကို ပြောသည်။

ယင်းရှော့ခ်တိုက်ဒုံးများကို ရမခ တိုင်းဌာနချုပ်၏ အနောက်ဘက်ရှိ ဆင်တောင်အနောက်ဘက်ခြမ်းမှ ပစ်ခတ်ခြင်းဖြစ်ပြီး လားရှိုး – မိုင်းယော်လမ်းပေါ်ရှိ အဆိုပါ ဆင်တောင်သည် လားရှိုးမြို့နှင့် ၁၀ မိုင်ခန့် သာ ကွာဝေးသည်။

“သူတို့ (လားရှိုးမြို့ခံများ) ပြောတာတော့ ပစ်တာက ဆင်တောင် အနောက်ဘက်။ ရမခ အနောက် ဘက်မှာ ဆင်တောင်ရှိတယ်။ အဲဒီ ဆင်တောင်အနောက်ဘက်ကနေ ပစ်တာလို့ ပြောတယ်” ဟု ၎င်းက ဆက်လက်ပြောကြားသည်။

‎

ရှမ်းပြည်တိုးတက်ရေးပါတီ (SSPP) ကလည်း လားရှိုးမြို့ အမှတ် (၆) ရပ်ကွက်၊ အမှတ် (၁၀) ရပ်ကွက်နှင့် လားရှိုးအခြေစိုက် အရှေ့မြောက်ပိုင်းတိုင်းစစ်ဌာနချုပ် (ရမခ)၊ အမှတ် (၆၂၆) တပ်ရင်းများထဲသို့ ရှော့ခ်တိုက်ဒုံးများ ကျရောက်ပေါက်ကွဲခဲ့ကြောင်း အတည်ပြုထားသည်။

‎ပြီးခဲ့သည့် ဧပြီလ အတွင်းကလည်း လားရှိုးမြို့အခြေစိုက် အာဏာလုစစ်တပ်၏ တပ်ရင်းဌာနချုပ် တစ်ခုထဲသို့ ရှော့ခ်တိုက်ဒုံး တစ် လုံး ကျရောက်ပေါက်ကွဲခဲ့ဖူးသည်။ လက်ရှိ လားရှိုးမြို့တွင် အာဏာလု စစ်အုပ်စုက မြို့ပေါ်ရှိ ရပ်ကွက် ၁၂ ရပ်ကွက်ကိုသာ ထိန်းချုပ်ထားနိုင်ပြီး မြို့နယ်အတွင်းရှိ ကျေးရွာများကိုမူ ကိုးကန့်တပ်ဖွဲ့ (MNDAA) က ထိန်းချုပ်ထားကြောင်း သိရသည်။

ဓာတ်ပုံ-SSPP၊ လူမှုကွန်ရက်