ကုလသမဂ္ဂအတွက် “ငွေမရှိမဖြစ် ပေးရမည့် အချိန်ကာလ ကုန်ဆုံးပြီ” ဟု အမေရိကန် သံအမတ် ဝေါ့လ်ဇ် ပြောကြား

PSM (NEWS)

ဖေဖော်ဝါရီ ၁၊ ၂၀၂၆

အမေရိကန်ပြည်ထောင်စု၏ ကုလသမဂ္ဂဆိုင်ရာ အမြဲတမ်းသံအမတ် မိုက်ခ် ဝေါ့လ်ဇ် (Ambassador Mike Waltz) က ကုလသမဂ္ဂ (UN) အပေါ် အမေရိကန်အစိုးရ၏ ငွေကြေးပံ့ပိုးမှု မူဝါဒကို ပြင်းပြင်းထန်ထန် ပြောင်းလဲသွားမည်ဖြစ်ကြောင်း ထုတ်ဖော်ပြောကြားလိုက်သည်။

လူမှုကွန်ရက် X (ယခင် Twitter) တွင် ရေးသားခဲ့သည့် စာတိုတစ်ပုဒ်အတွင်း ဝေါ့လ်ဇ်က “President Trump has been clear: The days of blank checks to the UN are OVER” ဟု ဖော်ပြခဲ့ပြီး၊ ယင်းစကားရပ်မှာ ကုလသမဂ္ဂအား အကန့်အသတ်မရှိ ငွေကြေးပေးနေသည့် အစဉ်အလာကို အဆုံးသတ်မည် ဟု ဆိုလိုခြင်းဖြစ်သည်။

ထို့နောက် ၎င်းက “defunding the bloated UN system” ဟု ဆက်လက်ရေးသားခဲ့ရာ၊ ယင်းမှာ လူအင်အားနှင့် အသုံးစရိတ် အလွန်အကျွံ ကြီးမားလာပြီး လုပ်ငန်းဆောင်ရွက်မှု မထိရောက်ဟု သတ်မှတ်ထားသော ကုလသမဂ္ဂစနစ်အပေါ် ငွေကြေးထောက်ပံ့မှုများကို ဖြတ်တောက်မည် ဟု အဓိပ္ပါယ်ရသည်။

ဝေါ့လ်ဇ်၏ ပြောကြားချက်အရ ကုလသမဂ္ဂအတွင်းရှိ အုပ်ချုပ်ရေးဝန်ထမ်း ၂,၉၀၀ ခန့်ကို လျှော့ချခဲ့ပြီး၊ စုစုပေါင်း ဘတ်ဂျက် ဒေါ်လာ သန်း ၅၀၀ ကိုလည်း ဖြတ်တောက်လိုက်ပြီဖြစ်ကြောင်း သိရသည်။

ထို့အပြင် ဝေါ့လ်ဇ်က “put the UN on a DIET” ဟုလည်း ဖော်ပြခဲ့ရာ၊ ယင်းစကားရပ်မှာ ကုလသမဂ္ဂ၏ အသုံးစရိတ်များကို တင်းကျပ်စွာ ထိန်းချုပ်ပြီး မလိုအပ်သော ကုန်ကျစရိတ်များကို လျှော့ချကာ စနစ်ကို ပိုမိုထိရောက်အောင် ပြုလုပ်မည် ဟု ဆိုလိုခြင်းဖြစ်ကြောင်း သုံးသပ်ရသည်။

ဝေါ့လ်ဇ်က အဆိုပါ ခြေလှမ်းများသည် ကုလသမဂ္ဂ၏ မူလရည်ရွယ်ချက်များကို ပြန်လည်အသက်သွင်းနိုင်ရန် အရေးကြီးသော ပြုပြင်ပြောင်းလဲမှုများ၏ အစသာ ဖြစ်ကြောင်း နှင့် ယင်းလုပ်ငန်းစဉ်ကို ဆက်လက်အရှိန်မြှင့်သွားမည်ဖြစ်ကြောင်းလည်း အလေးထားပြောကြားခဲ့သည်။

အမေရိကန်အစိုးရ၏ ယင်းမူဝါဒပြောင်းလဲမှုသည် ကုလသမဂ္ဂ၏ ဘဏ္ဍာရေးနှင့် လုပ်ငန်းဆောင်ရွက်မှုများအပေါ် အကျိုးသက်ရောက်မှုများ ရှိလာနိုင်ကြောင်း နိုင်ငံတကာလေ့လာသူများက သုံးသပ်နေကြသည်။

ကိုးကား — BNO News / @USAmbUN (X/Twitter)

#ကုလသမဂ္ဂ

#အမေရိကန်

#သံအမတ်_ဝေါ့လ်ဇ်

#ငွေကြေးပံ့ပိုးမှု_မူဝါဒ

#ဘဏ္ဍာရေး

#PSM_News