ရိုဟင်ဂျာကယ်ဆယ်ရေး ရန်ပုံငွေစီမံခန့်ခွဲမှု လွဲမှားမှုကြောင့် အမေရိကန်ဒေါ်လာ သန်းနှင့်ချီ ဆုံးရှုံးနေ

PSM(News)

ဇူလိုင် ၈၊၂၀၂၆

ဘင်္ဂလားဒေ့ရှ်နိုင်ငံရှိ ရိုဟင်ဂျာဒုက္ခသည်စခန်းများတွင် ကုလသမဂ္ဂ ဒုက္ခသည်များဆိုင်ရာ မဟာမင်းကြီးရုံး (UNHCR) ၏ စီမံခန့်ခွဲမှုအောက်မှ ကယ်ဆယ်ရေးစီမံကိန်းများတွင် စနစ်တကျ စီမံခန့်ခွဲမှု လွဲမှားခြင်းနှင့် ရန်ပုံငွေအလွဲသုံးစားလုပ်ခြင်းများ ရှိနေကြောင်း ကုလသမဂ္ဂ၏ ပြည်တွင်းစောင့်ကြည့်စစ်ဆေးရေးရုံး (OIOS) က ထုတ်ပြန်သည့် စာရင်းစစ်အစီရင်ခံစာတွင် ဖော်ပြထားသည်။

ရန်ပုံငွေလေလွင့်မှုများ

၂၀၂၃ ခုနှစ် ဇန်နဝါရီလမှ ၂၀၂၄ ခုနှစ် ဒီဇင်ဘာလအထိ ကာလအတွင်း စစ်ဆေးတွေ့ရှိချက်များအရ ကယ်ဆယ်ရေးလုပ်ငန်းစဉ်များတွင် ပွင့်လင်းမြင်သာမှု အားနည်းနေကြောင်း ထင်ရှားနေသည်။ အဓိကအားဖြင့် ဒုက္ခသည်များ၏ လက်တွေ့လိုအပ်ချက်နှင့် ကိုက်ညီမှုမရှိသည့် ပစ္စည်းများကို ဝယ်ယူခြင်း၊ စျေးကွက်ပေါက်စျေးထက် ပိုမိုမြင့်မားသောနှုန်းထားများဖြင့် ကန်ထရိုက်တာများထံ လုပ်ငန်းအပ်နှံခြင်းနှင့် ထိရောက်မှုမရှိသည့် တည်ဆောက်ရေးစီမံကိန်းများအတွက် ငွေကြေးအမြောက်အမြား သုံးစွဲခြင်းတို့ကြောင့် အမေရိကန်ဒေါ်လာ သန်းနှင့်ချီ၍ ဆုံးရှုံးခဲ့ရသည်။

အစီရင်ခံစာတွင် ဖော်ပြချက်အရ မီးဖိုချောင်သုံးပစ္စည်း အစုံပေါင်း ၆၂,၀၀၀ ကျော် (အမေရိကန်ဒေါ်လာ ၁.၃၂ သန်းတန်ဖိုး) မှာ အသုံးမပြုဘဲ ပုံထားရသည့်အခြေအနေသို့ ရောက်ရှိနေသည်။ ထို့ပြင် ဆင်ကင်းစောင့်မျှော်စင် တည်ဆောက်ရေးစီမံကိန်းတွင် အမေရိကန်ဒေါ်လာ ၂.၂ သန်း သုံးစွဲခဲ့သော်လည်း ထိရောက်မှု မရှိခဲ့ပေ။ ယာဉ်အစီးရေ ရာနှင့်ချီ၍ ဝယ်ယူထားသော်လည်း ယာဉ်မောင်းဦးရေနှင့် ကိုက်ညီမှု မရှိခြင်းနှင့် အသုံးမပြုသည့် ယာဉ်များအတွက် ငှားရမ်းခများ ပေးဆောင်နေရခြင်းသည်လည်း စီမံခန့်ခွဲမှု ချို့ယွင်းချက်တစ်ခုအဖြစ် ထောက်ပြထားသည်။

ကန်ထရိုက်တာရွေးချယ်မှုနှင့် ပွင့်လင်းမြင်သာမှု

တည်ဆောက်ရေးနှင့် ဝယ်ယူရေးကန်ထရိုက်များ ချပေးရာတွင်လည်း ကန်ထရိုက်တာတစ်ဦးတည်းအား စျေးကွက်ပေါက်စျေးထက် ၂၆ ရာခိုင်နှုန်း ပိုမိုပေး၍ အပ်နှံခဲ့ခြင်းကြောင့် အမေရိကန်ဒေါ်လာ ၆.၅ သန်း ဆုံးရှုံးခဲ့သည်။ အလားတူ စွမ်းအင်နှင့် သဘာဝပတ်ဝန်းကျင်ဆိုင်ရာ စီမံကိန်းများတွင်လည်း လုပ်ငန်းများကို ဈေးနှုန်းမြင့်မားစွာဖြင့် အပ်နှံခဲ့သည့်အတွက် အမေရိကန်ဒေါ်လာ ၁.၅ သန်းကျော် လေလွင့်ဆုံးရှုံးခဲ့ရကြောင်း စာရင်းစစ်အစီရင်ခံစာ၌ ပါရှိသည်။

လူသားချင်းဆိုင်ရာ အကျိုးဆက်များ

နိုင်ငံတကာအလှူရှင်များ၏ ရန်ပုံငွေများ လျော့နည်းလာချိန်တွင် အဆိုပါ ရန်ပုံငွေများကို အလွဲသုံးစားလုပ်ခြင်းသည် ရိုဟင်ဂျာဒုက္ခသည်များ၏ စားနပ်ရိက္ခာ၊ ကျန်းမာရေးနှင့် ပညာရေး ဝန်ဆောင်မှုများကို တိုက်ရိုက်ထိခိုက်စေသည်။

UNHCR အနေဖြင့် စာရင်းစစ်ဆေးတွေ့ရှိချက်များကို အသိအမှတ်ပြုထားပြီး ပြုပြင်ပြောင်းလဲမှုများ လုပ်ဆောင်ရန် ကတိပြုထားသော်လည်း၊ နိုင်ငံတကာ၏ ယုံကြည်မှုကို ပြန်လည်ရရှိရန်အတွက် လုပ်ငန်းစဉ်တစ်ခုလုံး၏ ပွင့်လင်းမြင်သာမှုကို ပြသရန် လိုအပ်လျက်ရှိသည်။ လူသားချင်းစာနာမှု အဖွဲ့အစည်းများသည် ပြည်သူ့အခွန်ငွေဖြင့် လုပ်ဆောင်နေရသည့်အတွက် အမြင့်ဆုံးသော တာဝန်ခံမှုစံနှုန်းများကို လိုက်နာရန် အရေးကြီးကြောင်း လေ့လာသူများက သုံးသပ်တင်ပြထားသည်။

ကိုးကား-Daily Star