PSM (News) စက်တင်ဘာ ၇၊ ၂၀၂၆ တနင်္သာရီတိုင်း၊ လောင်းလုံးမြို့နယ်ရှိ ဆိုင်ကယ်ပြင်ဆိုင်တစ်ခုကို သတင်းအရ ဝင်ရောက်ရှာဖွေရာ မူးယစ်ဆေးဝါးများ၊ သေနတ်နှင့် ဆက်စပ်ပစ္စည်းများနှင့်အတူ ရောင်းဝယ်သူ အမျိုးသားတစ်ဦးကို ဖမ်းဆီးရမိခဲ့ကြောင်း လောင်းလုံးမြို့နယ် ပြည်သူ့လုံခြုံရေးတပ်ဖွဲ့က ယမန်နေ့ စက်တင်ဘာ ၆ ရက်က ထုတ်ပြန်ထားသည်။ ဖြစ်စဉ်မှာ လောင်းလုံးမြို့နယ်အတွင်းရှိ ဆိုင်ကယ်ပြင်ဆိုင်တစ်ခု၌ မူးယစ်ဆေးဝါး ရောင်းဝယ်ဖောက်ကားနေကြောင်း သတင်းအရ မြို့နယ်လုံခြုံရေးမှူးနှင့် ဒုတိယမြို့နယ်လုံခြုံရေးမှူးတို့ ဦးစီးသည့် ပြည်သူ့လုံခြုံရေးတပ်ဖွဲ့က သွားရောက်ရှာဖွေခဲ့ခြင်းဖြစ်သည်။ ထိုသို့ ဝင်ရောက်ရှာဖွေရာတွင် အသက် ၃၈ နှစ်အရွယ် မူးယစ်ဆေးဝါး ရောင်းဝယ်သူ အမျိုးသားတစ်ဦးထံမှ WY စိတ်ကြွရူးသွပ်ဆေးပြား ၁၆၈ လုံး၊ BA 94 သေနတ် ၁ လက်၊ မြန်မာငွေ ၁၁,၀၅,၇၀၀ ကျပ်၊ လက်ကိုင်ဖုန်း ၂ လုံး၊ လက်ပတ်နာရီ ၆ လုံး၊ အိတ် ၄ လုံးနှင့် မူးယစ်ဆေးဝါး သုံးစွဲရာတွင် အသုံးပြုသည့် ဆက်စပ်ပစ္စည်းများကို လက်ဝယ်တွေ့ရှိ ဖမ်းဆီးရမိခဲ့သည်။ လက်ရှိတွင် ဖမ်းဆီးရမိထားသူ မူးယစ်ဆေးဝါး ရောင်းဝယ်သူအား ထိရောက်စွာ အရေးယူနိုင်ရေးအတွက် ဥပဒေလုပ်ထုံးလုပ်နည်းများနှင့်အညီ ဆက်လက်ဆောင်ရွက်လျက်ရှိကြောင်း သိရသည်။ ဓာတ်ပုံ-လောင်းလုံးပလဖ Post navigation ပြည်သူ့ခုခံတွန်းလှန်စစ် ၅ နှစ်ပြည့်တွင် KIA စစ်ဦးစီးချုပ် ဒု-ဗိုလ်ချုပ်ကြီး R. ခေါင်လွမ်းအပါအဝင် ရဲဘော်၊ မဟာမိတ် ၁,၇၉၀ ကျော်ကို NUG က ဘွဲ့နှင့်ဆုများ ပထမဆုံးအကြိမ် ချီးမြှင့် ပေါက်မြို့နယ်တွင် စစ်အုပ်စု ပါရာမော်တာတစ်စီး ပျက်ကျခဲ့ပြီး နမခမှ ပါရာမော်တာများဖြင့် ချောင်းဦးကို လေကြောင်းတိုက်ခိုက်
