PSM News ဇန်နဝါရီ ၂၇၊ ၂၀၂၆ ဖိလစ်ပိုင်သမ္မတဟောင်း ရိုဒရီဂို ဒူတာတေး သည် အပြည်ပြည်ဆိုင်ရာရာဇဝတ်ခုံရုံး (ICC) ၏ ကြိုတင်တရားစွဲဆိုမှု (Pre-Trial Proceedings) တွင် ကိုယ်တိုင်ပါဝင်နိုင်ရန် လုံလောက်သော ကျန်းမာရေးအခြေအနေရှိနေကြောင်း ICC က ထုတ်ပြန်ကြေညာခဲ့သည်။ ICC ၏ ထုတ်ပြန်ချက်အရ ဒူတာတေး၏ ကျန်းမာရေးအခြေအနေကို ဆေးဘက်ဆိုင်ရာ စစ်ဆေးမှုများအပေါ် မူတည်၍ သုံးသပ်ပြီးနောက်၊ လက်ရှိအခြေအနေမှာ တရားရေးလုပ်ငန်းစဉ်များတွင် ပါဝင်နိုင်သည့် အနေအထားဖြစ်ကြောင်း အတည်ပြုခဲ့သည်။ ယင်းအမှုနှင့် ပတ်သက်၍ အမှုအတည်ပြုကြားနာမှု (Confirmation of Charges Hearing) ကို ၂၀၂၆ ခုနှစ် ဖေဖော်ဝါရီလ ၂၃ ရက် မှ စတင်ကျင်းပသွားမည်ဖြစ်ကြောင်း ICC က ကြေညာထားသည်။ အဆိုပါ ကြားနာမှုတွင် ICC တရားသူကြီးများက ဒူတာတေးအား စွဲချက်တင်ထားသည့် အမှုများကို တရားဝင် အတည်ပြုမည် မပြုမည်ကို ဆုံးဖြတ်သွားမည်ဖြစ်ပြီး၊ အတည်ပြုခံရပါက နောက်တစ်ဆင့်ဖြစ်သည့် တရားစီရင်မှု အဆင့်သို့ ဆက်လက်ရောက်ရှိသွားမည်ဖြစ်သည်။ ဒူတာတေးသည် သမ္မတတာဝန်ထမ်းဆောင်စဉ်ကာလအတွင်း မူးယစ်ဆေးဝါး တိုက်ဖျက်ရေး စစ်ဆင်ရေးများ နှင့် ဆက်နွယ်၍ လူသေဆုံးမှုများ အများအပြား ဖြစ်ပွားခဲ့သည့်အပေါ် လူသားဆန့်ကျင်မှုဆိုင်ရာ ရာဇဝတ်မှုများ ဖြင့် ICC မှ စုံစမ်းစစ်ဆေးနေသူဖြစ်သည်။ ICC ၏ ယခုဆုံးဖြတ်ချက်သည် ဖိလစ်ပိုင်နိုင်ငံအတွင်းသာမက နိုင်ငံတကာအဆင့်တွင်ပါ အာရုံစိုက်ခံနေရပြီး၊ အမှု၏ နောက်ဆက်တွဲ အခြေအနေများကိုလည်း ဆက်လက် စောင့်ကြည့်ရမည် ဖြစ်ကြောင်း လေ့လာသူများက သုံးသပ်ထားကြသည်။ ကိုးကား – ABS-CBN #ဒူတာတေး #အပြည်ပြည်ဆိုင်ရာရာဇဝတ်ခုံရုံး #အမှုအတည်ပြုကြားနာမှု #အတည်ပြု #ဖိလစ်ပိုင် #မူးယစ်ဆေးဝါး_တိုက်ဖျက်ရေး #PSM_News Post navigation အီရန်၏ လျှို့ဝှက်သင်္ဘောများဖြင့် မြန်မာစစ်ကော်မရှင်၏ လေကြောင်းစစ်ဆင်ရေးများအတွက် လောင်စာဆီ ထောက်ပံ့နေ 𝐏𝐒𝐌 𝐍𝐞𝐰𝐬 – နိုင်ငံတကာသတင်းများ( ၂၇.၁. ၂၀၂၆ )
