အီရန်၏ တိုက်ခိုက်မှုများအပြီး ယူကရိန်း၏ ဒရုန်းရန်ကာကွယ်ရေး နည်းပညာကို အမေရိကန် အသုံးပြုလာဟု သတင်းရင်းမြစ်များ ပြောကြား

PSM(NEWS)

ဧပြီ ၂၃၊၂၀၂၆

ဆော်ဒီအာရေးဗီးယားရှိ အမေရိကန်၏ အဓိက လေတပ်အခြေစိုက်စခန်း တစ်ခုဖြစ်သော Prince Sultan လေတပ်စခန်းတွင် လတ်တလော ရက်သတ္တပတ်များအတွင်း ယူကရိန်း၏ ဒရုန်းရန်ကာကွယ်ရေး နည်းပညာကို စတင်အသုံးပြုနေပြီဖြစ်ကြောင်း ကိစ္စရပ်နှင့် နီးစပ်သူ ၅ ဦးက Reuters သို့ ပြောကြားသည်။

အဆိုပါ စခန်းသည် အမေရိကန် လေယာဉ်များနှင့် အဆောက်အအုံများ ပျက်စီးစေသည့်အပြင် တပ်ဖွဲ့ဝင်တစ်ဦး သေဆုံးစေခဲ့သော အီရန်၏ ဒရုန်းတိုက်ခိုက်မှုများကို ရင်ဆိုင်နေရခြင်း ဖြစ်သည်။

ယခင်က သတင်းထုတ်ပြန်ထားခြင်း မရှိသည့် Sky Map ဟု ခေါ်သော ယူကရိန်း၏ ကွပ်ကဲမှုနှင့် ထိန်းချုပ်ရေးစနစ်ကို Prince Sultan စခန်းတွင် ဖြန့်ကြက်ချထားခြင်းမှာ ရုရှားနှင့် ၄ နှစ်ကြာ စစ်ဖြစ်ပွားနေသည့် ယူကရိန်း၏ တိုက်ပွဲဝင် လက်တွေ့ကျသော ဒရုန်းနှင့် ဒရုန်းရန်ကာကွယ်ရေး နည်းပညာများတွင် ထိပ်တန်းသို့ ရောက်ရှိနေကြောင်း ပြသနေသည်။

ယူကရိန်း စစ်ဘက်တာဝန်ရှိသူများသည် အဆိုပါ အခြေစိုက်စခန်းသို့ ရောက်ရှိလာပြီး အမေရိကန် စစ်သည်များကို Sky Map အသုံးပြုပုံ သင်ကြားပေးခဲ့ကြောင်း သိရသည်။ Sky Map သည် အီရန်ထုတ် Shahed ဒရုန်းများ အပါအဝင် ဝင်ရောက်လာမည့် အန္တရာယ်များကို ထောက်လှမ်းရန်နှင့် ကြားဖြတ်ဟန့်တားရေး ဒရုန်းများဖြင့် ပြန်လည်တိုက်ခိုက်ရန် ယူကရိန်းစစ်တပ်က ကျယ်ကျယ်ပြန့်ပြန့် အသုံးပြုနေသည့် စနစ်ဖြစ်သည်။

ရုရှား-ယူကရိန်း စစ်ပွဲတွင် ကုန်ကျစရိတ်သက်သာသည့် ဒရုန်းများကို အမြောက်အမြား အသုံးပြုလာမှုကြောင့် ပင်တဂွန်စစ်ဌာနချုပ်သည် ဒရုန်းရန်ကာကွယ်ရေးအတွက် ရင်းနှီးမြှုပ်နှံမှုများ တိုးမြှင့်ခဲ့သည်။ သို့သော် အီရန်နှင့် မိုင် ၄၀၀ ခန့်သာ ကွာဝေးပြီး ဒရုန်းနှင့် ဒုံးကျည်လှိုင်းများကို ဆက်တိုက် ရင်ဆိုင်နေရသည့် Prince Sultan စခန်းတွင် ယူကရိန်းနည်းပညာကို အားကိုးလာရခြင်းမှာ အမေရိကန်၏ လေကြောင်းကာကွယ်ရေးတွင် အားနည်းချက်များ ရှိနေကြောင်း ဝေဖန်ဆန်းစစ်သူများက ထောက်ပြနေကြသည်။

လွန်ခဲ့သော တစ်လခန့်က သမ္မတ ဒေါ်နယ်ထရန့်သည် အီရန်၏ ဒရုန်းတိုက်ခိုက်မှုများကို နှိမ်နင်းရန် ကူညီပေးမည်ဟူသော ယူကရိန်းသမ္မတ ဇလန်းစကီး၏ ကမ်းလှမ်းမှုကို လူသိရှင်ကြား ငြင်းပယ်ခဲ့ဖူးသည်။ “ဒရုန်းရန်ကာကွယ်ရေးအတွက် သူတို့ဆီက အကူအညီ မလိုပါဘူး” ဟု ထရန့်က မတ်လ ၆ ရက်နေ့တွင် Fox News သို့ ပြောကြားခဲ့သည်။

အိမ်ဖြူတော်နှင့် ပင်တဂွန်တို့ကမူ ယခုကိစ္စနှင့် ပတ်သက်၍ အမေရိကန် အလယ်ပိုင်း စစ်ဌာနချုပ်သို့သာ မေးမြန်းရန် လွှဲပြောင်းခဲ့ပြီးအလယ်ပိုင်း စစ်ဌာနချုပ် က မှတ်ချက်ပေးရန် ငြင်းဆိုခဲ့သည်။ Sky Map ကို ပိုင်ဆိုင်သော Sky Fortress ကုမ္ပဏီနှင့် ဇလန်းစကီး၏ ရုံးခန်းတို့ကလည်း တစ်စုံတစ်ရာ တုံ့ပြန်ပြောကြားခြင်း မရှိသေးပေ။

Prince Sultan စခန်းတွင် Sky Map အပြင် Northrop Grumman ၏ FAAD စနစ်နှင့် RTX ၏ Coyote ကြားဖြတ်ဟန့်တားရေး ဒရုန်းများကိုလည်း အသုံးပြုနေသည်။

သို့သော် နည်းပညာသစ်များ စမ်းသပ်ရာတွင် စိန်ခေါ်မှုများ ရှိနေဆဲဖြစ်ပြီး၊ ယခုလအစောပိုင်းက စမ်းသပ်မှုတစ်ခုတွင် Merops အမည်ရှိ ဒရုန်းတစ်စင်းမှာ ထိန်းချုပ်မှုလွတ်ကာ စခန်းအတွင်းရှိ အိမ်သာဆောင်တစ်ခုအတွင်းသို့ ပျက်ကျခဲ့ကြောင်း သတင်းရင်းမြစ်များက ဆိုသည်။

အဆိုပါ လေတပ်စခန်းသည် စစ်ပွဲစတင်ကတည်းက Shahed ဒရုန်းများနှင့် ဒုံးကျည်များဖြင့် အကြိမ်ကြိမ် တိုက်ခိုက်ခံခဲ့ရသည်။ မတ်လ ၂၇ ရက် တိုက်ခိုက်မှုတွင် အမေရိကန်၏ E-3 Sentry (AWACS) ထောက်လှမ်းရေး လေယာဉ်တစ်စင်း ပျက်စီးခဲ့သလို၊ ဆီဖြည့်လေယာဉ်များနှင့် THAAD ဒုံးခွဲစနစ်၏ ရေဒါများကိုလည်း ထိမှန်ခဲ့ဖူးသည်။

ကိုးကား Reuters