လုပ်ခလစာနှင့် အလုပ်အကိုင်လုံခြုံရေးအတွက် တောင်ကိုရီးယား ကာခါအို ကုမ္ပဏီ အလုပ်သမားသမဂ္ဂ ၄ နာရီကြာ သပိတ်မှောက် ဆန္ဒပြ

PSM (NEWS)

ဇွန် ၁၁၊ ၂၀၂၆

တောင်ကိုရီးယားနိုင်ငံ၏ နည်းပညာကုမ္ပဏီကြီးတစ်ခုဖြစ်သော Kakao မှ အလုပ်သမားသမဂ္ဂဝင်များသည် ကုမ္ပဏီ၏ အပိုဆုကြေးစနစ် ပြုပြင်ပြောင်းလဲရန်နှင့် အလုပ်အကိုင်လုံခြုံရေး အာမခံချက်ပေးရန် တောင်းဆိုသည့်အနေဖြင့် ဗုဒ္ဓဟူးနေ့က ၄ နာရီကြာ သပိတ်မှောက်ဆန္ဒပြပွဲတစ်ရပ် ပြုလုပ်ခဲ့ကြသည်။

အနက်ရောင် တီရှပ်များ ဝတ်ဆင်ပြီး ထီးဖြူများ ဆောင်းထားကြသည့် ရာနှင့်ချီသော အလုပ်သမားများသည် နံနက်ပိုင်းတွင် ကာခါအိုရုံးခန်းအတွင်းမှ ထွက်ခွာလာခဲ့ကြပြီး၊ ဂျောင်ဂီပြည်နယ်၊ ပန်ဂယို နည်းပညာအချက်အချာဒေသရှိ အနီးနားရှိ ရင်ပြင်တစ်ခုသို့ လမ်းလျှောက်ချီတက်ကာ ဆန္ဒပြခဲ့ကြသည်။ အဆိုပါ ဆန္ဒပြပွဲကို တေးဂီတဖျော်ဖြေမှုတစ်ခုဖြင့် စတင်ခဲ့သည်။

ဆန္ဒပြပွဲတွင် သမဂ္ဂအဖွဲ့ဝင် ၁,၂၀၀ ခန့်အထိ ပါဝင်မည်ဖြစ်ကြောင်း သမဂ္ဂဘက်က ရဲတပ်ဖွဲ့ထံ ကြိုတင်အကြောင်းကြားခဲ့ပြီး၊ ဆန္ဒပြပွဲသည် ငြိမ်းချမ်းစွာ ပြီးဆုံးခဲ့ကာ ညနေ ၃ နာရီတွင် လူစုခွဲခဲ့ကြသည်။

ထို့အပြင် လာမည့် ဇွန်လ ၂၉ ရက်နေ့တွင် အဖွဲ့ဝင် ၅,၀၀၀ စလုံး ပါဝင်မည့် အထွေထွေသပိတ်ကြီးကို ဆင်နွှဲရန် သမဂ္ဂက စီစဉ်နေကြောင်း ဒေသတွင်း မီဒီယာများက ဖော်ပြကြသော်လည်း၊ ယင်းသတင်းနှင့်ပတ်သက်၍ ရိုက်တာသတင်းဌာန၏ မှတ်ချက်ပေးရန် တောင်းဆိုမှုကို သမဂ္ဂကိုယ်စားလှယ်က တုံ့ပြန်ဖြေကြားခြင်း မရှိသေးပေ။ ကာခါအိုကုမ္ပဏီသည် လုပ်ငန်းခွဲ ၅ ခုတွင် စုစုပေါင်း ဝန်ထမ်း ၆,၀၀၀ခန့် ခန့်အပ်ထားသည်။

ကမ္ဘာလုံးဆိုင်ရာ AI နည်းပညာ အရှိန်အဟုန်ဖြင့် တိုးတက်လာမှုကြောင့် နည်းပညာကုမ္ပဏီများ စံချိန်တင် အမြတ်အစွန်းများ ရရှိနေချိန်တွင်၊ အာရှ၏ စတုတ္ထမြောက် စီးပွားရေးအင်အားအကောင်းဆုံး တောင်ကိုရီးယားနိုင်ငံ၌ ယခုကဲ့သို့ အလုပ်သမားရေးရာ မငြိမ်မသက်မှုများ ဆက်တိုက်ဆိုသလို ပေါ်ပေါက်လာခြင်းဖြစ်သည်။

Samsung Electronics ၏ အလုပ်သမားသမဂ္ဂသည်လည်း သပိတ်မှောက်ရန် ပြင်ဆင်ခဲ့ပြီးနောက်၊ ယခုလအစောပိုင်းတွင် Chip ကဏ္ဍမှ ရရှိသည့် ဘောနပ်စ်ကို လည်ပတ်မှုအမြတ်အစွန်း၏ ၁၀.၅ ရာခိုင်နှုန်းနှင့် ချိတ်ဆက်ပေးရန် ကုမ္ပဏီနှင့် သဘောတူညီမှု ရရှိခဲ့သည်။

တောင်ကိုရီးယားတွင် အသုံးအများဆုံး Messaging App ကို လည်ပတ်နေသည့် ကာခါအိုကုမ္ပဏီသည် အစိုးရက ကြားဝင်စေ့စပ်ပေးခဲ့သည့် ဆွေးနွေးပွဲများတွင် သမဂ္ဂနှင့် လုပ်ခလစာ သဘောတူညီချက်မရရှိဘဲ ပျက်ပြားခဲ့ကြောင်း ပြီးခဲ့သည့်လက ပြောကြားခဲ့သည်။

စီမံခန့်ခွဲမှုအဆင့် အမှုဆောင်များသည် မကြာသေးမီနှစ်များအတွင်း ဘောနပ်စ်များ ပိုမိုရရှိခဲ့ကြသော်လည်း အခြားသာမန်ဝန်ထမ်းများမှာမူ အကျိုးခံစားခွင့် အကန့်အသတ်သာ ရရှိခဲ့သည်ဟုဆိုကာ သမဂ္ဂက ကုမ္ပဏီ၏ အကျိုးခံစားခွင့်စနစ်ကို ပြုပြင်ပြောင်းလဲရန် တောင်းဆိုနေခြင်းဖြစ်သည်။

ကာခါအိုကုမ္ပဏီဘက်ကမူ သမဂ္ဂ၏ အမြတ်ခွဲဝေပေးရန် တောင်းဆိုချက်ကို လက်တွေ့မကျကြောင်း ပြောဆိုကာ ငြင်းပယ်ထားသည်။ သမဂ္ဂဘက်ကမူ ညှိနှိုင်းမှုအသေးစိတ်ကို အတည်ပြုရန် ငြင်းဆိုထားသည်။

ဆန္ဒပြပွဲအတွင်း သမဂ္ဂခေါင်းဆောင် စောဆန်းအွတ် က “အဆင့်မြင့် စီမံခန့်ခွဲသူတွေက တာဝန်ယူမှုကို ရှောင်လွှဲပြီး၊ အလုပ်သမားတွေရဲ့ စနစ်တကျ စနစ်တကျ စတေးခံရမှုကိုပဲ တောင်းဆိုနေတဲ့ စနစ်မျိုး ဖြစ်နေတယ်” ဟု စင်မြင့်ပေါ်မှ ဝေဖန်ပြောကြားခဲ့သည်။

အခြားသမဂ္ဂခေါင်းဆောင်တစ်ဦးဖြစ်သူ လီဟောင်ယောကလည်း ကုမ္ပဏီက ဝန်ထမ်းများ သတ်မှတ်ချက်ပြည့်မီပါက သို့မဟုတ် လုပ်သက်အလိုက် ကာခါအိုအစုရှယ်ယာများ ပေးအပ်မည့် Restricted Stock Units (RSU) အစီအစဉ်ကို ကမ်းလှမ်းခဲ့ကြောင်း၊ သို့သော် သမဂ္ဂက ယင်းကို ဆန့်ကျင်ပြီး တစ်ကြိမ်တည်းပေးမည့် ငွေသားဘောနပ်စ်ကိုသာ တောင်းဆိုခဲ့ကြောင်း ပြောကြားခဲ့သည်။

ကုမ္ပဏီဘက်ကမူ ဗုဒ္ဓဟူးနေ့တွင် ထုတ်ပြန်ချက်တစ်ခု ထုတ်ပြန်ခဲ့ပြီး ယခုသပိတ်မှောက်မှုအပေါ် အချိန်နှင့်တပြေးညီ တုံ့ပြန်ဆောင်ရွက်နိုင်မည့် စနစ်တစ်ခုကို လည်ပတ်နေကြောင်းနှင့် သမဂ္ဂနှင့် ဆက်လက်ညှိနှိုင်းသွားမည်ဖြစ်ကြောင်း ပြောကြားခဲ့သည်။

ကိုးကား-Reuters