တောင်အာဖရိကတွင် ရွှေ့ပြောင်းနေထိုင်သူဆန့်ကျင်ရေး ဆန္ဒပြမှုများဖြစ်ပွား

PSM(NEWS)

ဇူလိုင် ၁၊ ၂၀၂၆

တောင်အာဖရိကနိုင်ငံတစ်ဝန်းတွင် အင်္ဂါနေ့က ရွှေ့ပြောင်းနေထိုင်သူများကို ဆန့်ကျင်သည့် ဆန္ဒပြပွဲများ ပြုလုပ်ခဲ့ကြပြီး၊ အချို့နေရာများတွင် အကြမ်းဖက်မှုများနှင့် လုယက်မှုများ ဖြစ်ပွားခဲ့သောကြောင့် ရဲတပ်ဖွဲ့က လုံခြုံရေး တင်းကျပ်ထားရသည်။ ဆန္ဒပြသူများသည် စာရွက်စာတမ်းမဲ့ ရွှေ့ပြောင်းနေထိုင်သူများအား အင်္ဂါနေ့ နောက်ဆုံးထား၍ နိုင်ငံမှ ထွက်ခွာသွားရန် သတ်မှတ်ချက် ထုတ်ပြန်ထားခဲ့သည်။

ယင်းနေ့တွင် ဂျိုဟန်နက်စ်ဘတ်နှင့် ဒါဘန်မြို့တို့၌ ရာနှင့်ချီသော ဆန္ဒပြသူများသည် တောင်အာဖရိကအလံများ လွှမ်းခြုံလျက် တုတ်များ ကိုင်ဆောင်ကာ ချီတက်ခဲ့ကြသည်။ အာဏာပိုင်များက ရဲတပ်ဖွဲ့၊ သံချပ်ကာယာဉ်များနှင့် ရဟတ်ယာဉ်များဖြင့် လုံခြုံရေးယူထားခဲ့ရသည်။

ဆန္ဒပြသူတစ်ဦးဖြစ်သည့် ဆီလင်ဒီလီ ရှာဘာက “လူတွေ အလုပ်မလုပ်ရဘူး။ အလုပ်အကိုင်တွေကို တရားမဝင် နိုင်ငံခြားသားတွေက လုယူသွားကြတယ်။ ဒါဟာ မမျှတဘူး” ဟု ပြောကြားခဲ့သည်။

ရွှေ့ပြောင်းနေထိုင်သူများကမူ ယင်းသတ်မှတ်ချက်ကို ရုပ်ပိုင်းဆိုင်ရာ ခြိမ်းခြောက်မှုတစ်ခုအဖြစ် ရှုမြင်ကြသည်။ အချို့သော ဆန္ဒပြပွဲများတွင် အကြမ်းဖက်မှုများ ဖြစ်ပွားခဲ့ပြီး၊ လုယက်မှုများအတွက် လူအချို့ကို ဖမ်းဆီးထားကြောင်း ရဲတပ်ဖွဲ့က ပြောကြားခဲ့သည်။ ထို့အပြင် ဂျိုဟန်နက်စ်ဘတ်မြို့၊ သမ်ဘီဆာဒေသတွင် ဆန္ဒပြသူများက ရဲတပ်ဖွဲ့နှင့် ရွှေ့ပြောင်းနေထိုင်သူဟု သံသယရှိသူများအား ကျောက်ခဲများဖြင့် ပစ်ပေါက်ခဲ့ကြသည်။

ဧပြီလအတွင်း ဆန္ဒပြပွဲများ စတင်ခဲ့ချိန်မှစ၍ လူ ၅ ဦးထက်မနည်း သေဆုံးခဲ့ပြီး၊ ထောင်ပေါင်းများစွာမှာ နေအိမ်များနှင့် လုပ်ငန်းခွင်များမှ စွန့်ခွာထွက်ပြေးနေကြရသည်။ နိုင်ငံအတွင်းရှိ အိမ်ရှင်အချို့ကလည်း ၎င်းတို့၏ အဆောက်အအုံများ ဖျက်ဆီးခံရမည်ကို စိုးရိမ်သောကြောင့် နိုင်ငံခြားသား အိမ်ငှားများကို တရားမဝင် နှင်ထုတ်မှုများ ပြုလုပ်နေကြကြောင်း သိရသည်။

တောင်အာဖရိကသမ္မတ ဆီရယ်လ် ရာမာဖိုဆာက တရားမဝင် ရွှေ့ပြောင်းနေထိုင်မှုအပေါ် ပြည်သူများ၏ စိုးရိမ်ပူပန်မှုသည် အမှန်တကယ် ရှိနေကြောင်း အသိအမှတ်ပြုခဲ့သော်လည်း၊ ဆန္ဒပြပွဲများတွင် အကြမ်းဖက်မှုနှင့် ဖျက်ဆီးမှုများ ပြုလုပ်ခြင်းကိုမူ ပြင်းထန်စွာ ရှုတ်ချခဲ့သည်။

ကိုးကား-Reuters